Tania Fernández e Tania Álvarez suman táctica e resistencia para voltar ao ouro

O piragüismo galego segue a ser un dos deportes que máis alegrías está a dar a Galiza a nivel internacional. Após a excelente participación no Mundial de piragüismo Sprint de Milán (Italia) no mes de agosto, esta fin de semana foi no Campionato do Mundo de Maratón de Györ (Hungría) a competición onde se demostrou o potencial que ten o país. As protagonistas, desta vez, foron as padexeiras galegas Tania Álvarez (Club Marítivo Deportivo e Cultural Breogán) e Tania Fernández (Club Caiac Tudense) que se proclamaron de novo campioas do mundo de Maratón na categoría de K2 Sénior. Ambas as dúas xa conseguiran este mesmo título en 2022 e nestes últimos anos estiveron a piques de repetir fazaña en varias ocasións, aínda que no pasado ano e no europeo de Portugal do presente curso, foron cuartas. 16 deportistas da Galiza viaxarán ao Campionato Mundial de Piragüismo Loita contra as húngaras O de Györ non foi un ouro doado. As dúas galegas enfrontáronse ante unhas rivais complicadas que, ademais, tiñan a favor competir na casa e ante o seu público. As húngaras Zsofia Zserafin e Vanda Kiszli, por unha parte, e as súas compatriotas Panna Sinko e Panna Csepe, polo outra, seguiron unha boa parte da competición o ritmo das galegas mais non puideron superalas. "Foi unha proba moi disputada, coas bancadas animando continuamente ás embarcacións húngaras", explicou a Nós Diario onte desde o aeroporto de Baraxas, en Madrid, en viaxe de volta Tania Fernández. Con todo, a padexeira luguesa indicou que elas tamén contaban con afección que viaxou para animalas. "Ademais, coa proba iniciada o apoio que tiñan automotivounos moito", asegurou. En ningún momento esqueceu os anos anteriores nos que a medalla de ouro non chegaba. "A verdade é que voltar á competición a nivel mundial partindo dun cuarto posto e conseguir o ouro é algo espectacular". Para chegar en condicións ao Mundial as dúas "Tanias" preparáronse a fondo física e mentalmente, ademais de estudar en profundidade ás súas rivais. "Eu son do Grove e Tania [Álvarez], malia ser de Lugo, vive en Tui polo que adestramos xuntas regularmente", relatou a padexeira do club miñoto. Do calendario mensual sacaron "dúas ou tres sesións semanais na embarcación dupla, no K2" alén doutra en K1 que realizan en Pontevedra. Para conseguir coincidir botan man dunha complicada "organización en común para que non coincidan con outros adestramentos". Coñecer as rivais Na estratexia do piragüismo é fundamental, como acontecen noutros deportes, coñecer ás rivais e neste caso tamén foi así. Precisamente foi Tania Fernández a encargada de estudar previamente as outras embarcacións, como apuntou Tania Álvarez a Nós Diario. "Inicialmente levamos aprendido como son as outras embarcacións e a traxectoria que tiveron até chegar aquí", aclarou. Porén, tamén confesou que "unha cousa é sobre o papel e outra ben diferente é cando estás na propia competición". Yaiza Novo e Sara Durán, bronce no K4 500 do Mundial sub-23 Nesta ocasión a preparación previa serviulles para saber con antelación que as húngaras serían as rivais máis perigosas do percorrido e tamén no momento da chegada á meta. Para chegar a esa conclusión informáronse sobre os resultados que tiveron nas últimas competicións ademais de ter en conta a súa traxectoria. Vitoria xusta ao final "A verdade é que semella que as que facemos maratón facemos adrede ter unha vitoria tan axustada como a que tivemos", confesou Tania Álvarez. A afirmación refírese a que despois de 25 quilómetros de proba na chegada as galegas completaron o percorrido en 1 hora, 51 minutos e 22 segundos, superando en só 0,89 centésimas a Zserafin e Kiszli, e en apenas 2.67 segundos á outra dupla húngara formada por Sinko e Csepe. Esta circunstancia ten a súa explicación en que as padexeiras, tamén no caso das húngaras, chegaron "coas forzas xustas" ao remate da proba. Neste sentido, a deportista grovense sinalou que nos últimos metros sufriu varias cambras como consecuencia do esforzo que tivo que realizar. "Ao final tiras, aínda que sexa, de orgullo e de honor cos ánimos que che dá a xente que foi a vernos tamén desde as propias bancadas", asegurou a padexeira do Breogán. Fin de tempada Con este Mundial en Hungría rematou a tempada para Álvarez e Fernández nesta modalidade olímpica. "Agora toca descansar e pór o contador a cero", indicou con satisfacción a grovense a Nós Diario. O esforzo dos últimos meses precisa de reposición para seguir avanzando na súa carreira deportiva. A cita que veñen de gañar foi a máis importante do ano e ambas as dúas deportistas pensan xa no seguinte reto que será clasificarse de novo para estar no Mundial do ano vindeiro e tentar repetir o éxito. Claudia Couto: "Gañar é unha recompensa ao sacrificio que temos que facer as deportistas" "Se conseguimos chegar outra vez voltaremos a pensar ao grande", apunta con optimismo. Porén, para que isto aconteza, a afección ao piragüismo de grandes distancias aínda terá que agardar algúns meses. Tudense e Breogán senten orgullo polas súas padexeiras OMundial de Hungría viviuse con intensidade tamén na Galiza. No Club Breogán do Grove (O Salnés) o seu presidente, Félix Lamas, recoñeceu a Nós Diario que é "un orgullo contar con deportistas dese nivel" como Tania Álvarez dentro da entidade. Puxo en valor "a súa traxectoria" e a demostración viva de que "co traballo pódese chegar a conseguir os obxectivos que se marquen". Da mesma opinión é o seu adestrador, José Luis Otero que lembra que "cando se gaña todo é perfecto, mais para chegar antes tivo que pasar moito traballo". No caso de Tania Álvarez e de Tania Fernández este técnico considerou que o secreto do resultado final procede de que son "deportistas consagradas que saben moi ben o que teñen que facer para ganar e son moi metódicas para poder chegar a conseguilo". Clubs "con historia" Tania Álvarez, con modestia, significou que ambas as dúas pertencen "a clubs con moita historia, traxectoria e tamén títulos". Esta padexeira afirmou que entre as súas compañeiras e compañeiros "xa hai moita xente con medallas en mundiais, mesmo olímpicas". Porén, valorou a achega que realizaron co seu primeiro posto neste evento. "Estamos felices de pór o noso grao de area á historia das nosas entidades e tamén é un orgullo formar parte dela", concluíu.