O taekwondo da Galiza despunta de modo 'online' no Mundial de Técnica
Adaptación, resiliencia... para moita xente son palabras tornadas en consignas de libro de autoaxuda completamente carentes de significado, e máis nos tempos actuais onde se repiten como un mantra. Non obstante, en moitos casos non queda outra e hai que adaptarse, como fixo o taekwondo galego para poder continuar coa práctica deportiva.
Estes días estase a disputar o Mundial de Técnica e Freestyle, que se desenvolve de modo online e que conta cunha importante representación galega conformada por 15 deportistas, entre as que destaca Sonia Pérez, que tal e como informou a Federación Galega de Taekwondo (FGT), vén de alcanzar a rolda de semifinais na categoría Máster 1 feminino.
Porén, esa non é a única contribución galega a este torneo, pois a Galiza foi o primeiro lugar onde se comezou a empregar o formato de competicións online posteriormente adoptado a nivel internacional para a organización deste Mundial, aínda que Noelia García, directora técnica da FGT, non quere arrogarse os méritos e limítase a sinalar que "non" sabían "doutros casos até que a un par de clubs de aquí da Galiza se nos ocorreu durante o confinamento".
"Orixinalmente a idea era facer algo para motivar a rapazada durante o confinamento, e argallamos un campionato interno online. Como funcionou tan ben, a Federación Galega de Taekwondo desenvolveu logo un torneo oficial, cousa que despois tamén fixeron a española e tantas outras. Acabamos provocando un boom", confesa García cun sorriso para Nós Diario.
A tecnoloxía, fundamental para poder competir
O Mundial que actualmente está a ter lugar de modo online orixinariamente estaba previsto para ser en Dinamarca, pero cancelouse, como tantas outras probas deportivas, a causa da Covid-19, até que a tecnoloxía saíu ao rescate do taekwondo.
"O procedemento que tivemos que facer é bastante sinxelo", afirma a directora técnica da Federación Galega. "Primeiro, cada participante ten que gravar dous exercicios, que logo subimos a unha plataforma. Máis tarde, recibimos os resultados da arbitraxe, dicíndonos se pasamos ou non de rolda. De ser positiva a valoración, vólvense gravar outros dous exercicios que serán arbitrados dentro de dez días", explica.
Sobre o papel das deportistas galegas no Campionato do Mundo, para Noelia García o feito de pasar de rolda "é a caña, porque hai un auténtico nivelazo". A causa é que, ademais das nacións que compiten habitualmente nestes torneos, o feito de ser online fixo que outros países que habitualmente deciden non competir por problemas económicos se animasen a participar.
Deste modo, na categoría Cadete acumúlanse até 250 participantes de 60 nacionalidades distintas para só oito postos na gran final. A principal diferenza entre categorías radica na Sénior, pois a diferenza das inferiores, tanto os exercicios como as valoracións son en directo, algo para o que Noelia García agarda que, chegado o caso, a situación sanitaria galega non sexa un impedimento, como en Catalunya, "onde que os ximnasios permanecesen fechados supuxo un problema".
