Radu é baixa para o partido do Celta contra o Dinamo Zagreb
O porteiro do Celta, Ionut Radu, sofre unha escordadura no polgar da man dereita, confirmada tras unha resonancia magnética e unha ecografía realizadas despois do partido en València ante o Levante.
Por este motivo, a entidade galega informa que o gardameta iniciará un tratamento médico e de fisioterapia, con traballo individual e limitación nos adestramentos específicos de portaría, o que impedirá a súa presenza en Europa League.
Neste sentido, o xogador do Celta non foi incluído na convocatoria para o partido desta quinta feira ante o Dinamo Zagreb, que terá lugar na casa do conxunto de Croacia, onde case con total seguridade será de novo a quenda de Iván Villar.
Este contratempo deixa o adestrador Claudio Giráldez pendente da evolución do xogador ante un calendario exixente, como é o caso do partido da fin de semana en Liga fronte ao Fútbol Club Barcelona, desta vez en Balaídos, para o que gardameta romanés é unha seria dúbida para entrar no 11.
O técnico porriñés revelou na rolda de prensa que ofreceu tras o último partido en València que as molestias de Radu non eran novas, senón que esa man xa lle viña dando problemas e mesmo evitou a súa participación en Copa.
Aínda á espera de se poderá ser o porteiro titular ante o Barcelona, si hai máis seguridade en que o tratamento permitirá a Radu superar os seus problemas na man e volver ao terreo de xogos tras a parada por seleccións que terá lugar despois da xornada de Liga.
Falece a abonada máis lonxeva, Asunción Arias
Por outra parte, a entidade viguesa expresou esta terza feira o seu "profundo pesar" polo pasamento de Asunción Arias de Castro, a abonada máis lonxeva do club. "O noso máis sincero pésame, agarimo e ánimo aos seus seres queridos", destacou.
