As peñas celtistas mostran o seu orgullo por un equipo que aposta pola súa canteira

A actual tempada do estaba marcada para o Celta nos libros da súa historia mesmo antes do seu comezo. A clasificación europea, a graza dun adestrador da casa e que aposta por ela e unha gran comuñón entre Balaídos e o equipo son varios dos factores que crearon un estado de ledicia na parroquia celeste. José Méndez Castro, presidente da súa Federación de Peñas desde, analiza a situación do conxunto vigués. Se por algo hai que empezar é pola situación máis actual do Celta, que marchou a este parón de outubro sen saborear unha vitoria na liga. Este mal arranque traduciuse en unicamente seis puntos conseguidos con empates que deixan o conxunto olívico fóra do descenso pero empatado co Girona e co Oviedo –equipo que esta mesma semana cesou o seu adestrador–. 'Pepe' Méndez confía no bo facer de Giráldez a pesar do mal inicio de tempada Ante esta situación, José 'Pepe' Méndez recalca que a prioridade do Celta debe seguir sendo a liga, e que o ano pasado xerou grandes expectativas na afección polo que este inicio "verde" resultou especialmente inesperado. Non obstante, confía nun cambio de dinámica a partir da vitoria ante o PAOK na Europa League, única do curso polo de agora, e as boas sensacións ante o Atlético para consolidar un cambio de tendencia. 'Pepe' Méndez considera que o Celta ten mellor cadro de xogadores que o ano pasado, malia que algunhas das súas fichaxes máis destacadas, como Bryan Zaragoza ou Ferrán Jutglá, non estean a producir o resultado que se agardaba delas. Destaca, ademais, o gran momento de Borja Iglesias como un dos estandartes actuais do equipo, acompañado dun Radu do que podía dubidarse máis ao inicio da tempada pero que está respondendo con boas actuacións. José Méndez Castro, presidente Federación de Peñas Celtistas. (Foto: Nós Diario) Con respecto ás baixas sufridas, Méndez destaca a perda de Alfón como unha das máis sensibles, aínda sabendo que todo parecía que deixaría o club dende antes do final de tempada. Sobre o caso Fer López destaca que foi "unha boa operación" a nivel económico ao tratarse dun xogador con aínda pouca experiencia no fútbol de elite. Malia os primeiros ventos de cambio que puideron asolagar Balaídos cando as cousas non saían ben, o presidente da Federación de Peñas do Celta ten claro que o banco celeste non pode cambiar de mans. Para el, Claudio Giráldez é indispensable neste Celta que se formou cunha gran relación entre canteira e primeiro equipo, polo que sería equivocado pensar en buscarlle substituto. Neste sentido, destaca directamente a relación entre os adestradores do primeiro equipo e a canteira, sendo estes os principais impulsores de oportunidades para os xogadores da base, algo do que no Celta agora mesmo presumen con orgullo. Cando Pepe fala de canteira, fala de identidade: "Identificámonos coa canteira, agora hai rapaces xogando que antes eran seareiros en Barreiro". Ao mesmo tempo, destaca a forte aposta do Consello de Administración do club por esta forma de executar a súa planificación deportiva, arriscada pero na que, ao seu ver, "polo de agora o que funciona non se toca". En definitiva, a conxunción de todas estas casuísticas xuntas: bos resultados e xogo do equipo, un adestrador como referente para a afección, rapaces da canteira tendo moitos minutos no primeiro equipo... xerou o ano pasado un grande ambiente entre bancada e equipo. Pepe Méndez quere destacar que, no que vai de tempada, se ben o equipo non remata de arrincar, a afección segue do seu lado, e que empate tras empate mantéñense as boas cifras de asistencia a Balaídos e de desprazamentos fóra. A viaxes por Europa Precisamente con respecto ás viaxes fóra este ano o Celta enfronta unha situación especial como é a de disputar a Europa League. O novo curso na segunda competición continental xa comezou cunha viaxe a Stuttgart saldada con derrota e unha vitoria na casa ante o PAOK. Por diante, ao Celta agárdalle desprazarse a Zagreb, a Ludogorets e, en último lugar, a Belgrado, destinos nos que seguro que a escuadra viguesa estará acompañada en maior ou menor cantidade por seareiros e seareiras celestes. Na primeira viaxe europea deste ano Pepe aproxima a cifra de desprazados e desprazadas co equipo nunhas 1.300 persoas. Valora esta cifra como "moi alta", especialmente polo pouco tempo do que se dispuxo para organizar a viaxe despois de saber o calendario a tan só 15 días do partido. A Federación de Peñas tiña organizado un bo chárter por unha axencia que finalmente non saíu adiante, pero si se conta con que funcione para os vindeiros desprazamentos a Ludogorets e Zagreb. A primeira viaxe europea do Celta foi acompañada por 1.300 persoas A última das visitas europeas desta primeira fase para o Celta será Belgrado, un lugar coñecido historicamente pola hostilidade dos seus grupos ultras. Na Federación de Peñas Celtistas coñecen o perigo deste ambiente, pero confían en que eles "nin pinchan nin cortan" contra eses grupos e confían en que todo se resolva ben neste destino. Polo de agora non teñen organizada esa viaxe, mais varias peñas xa manifestaron a súa intención de mobilizarse á capital serbia. O Celta debe xogar en Balaídos, e non en Miami Esta mesma semana confirmouse definitivamente que o partido entre o Vilarreal e o Barça correspondente á xornada 17 da liga xogarase en Miami (EUA) o 20 de decembro. Dita situación provocou unha forte polémica no mundo de fútbol con voces a favor, especialmente por parte das directivas e propietarios dos clubs, e moitas en contra, especialmente dende o sector das afeccións. Preguntado pola potencial situación de que isto se dese co Celta, 'Pepe' explica que se aparecese esa posibilidade o primeiro que terían que facer sería convocar unha asemblea entre todas as peñas para definir a postura da Federación. Non obstante, ten claro que a nivel persoal é unha idea que non lle gustaría o máis mínimo, da mesma maneira que rexeita a disputa da Supercopa de España fóra do Estado español. Ante este tema síntese bastante tranquilo pois dende o club "nin sequera insinuaron" unha posibilidade semellante. Polo de agora, explica Méndez, está contento con poder viaxar pola península para ver o Celta, coa vista posta nos desprazamentos ante o Osasuna do 26 de outubro ou ante o Puerto de Vega en Copa do Rei o 29 deste mes, unha viaxe na que agarda unha boa afluencia de seareiros e seareiras do club celeste.