Os mellores coches históricos regresan á Coruña da man do Rally Rías Altas

O Rally Rías Altas de Vehículos Históricos fai esta sexta feira dez anos na Coruña. Máis de 70 pilotos de diferentes puntos do país, o resto do Estado e de todo o mundo reúnense hoxe na Coruña para desfrutar dunha das competicións de automobilismo máis recoñecidas a nivel estatal. Esta proba enmárcase dentro do Campionato de España de Rallys para Vehículos Históricos (CERVH) e conta coa sona ser unha das mellor organizadas en toda a competición. Manel López, presidente do Club Rally Rías Altas e organizador desta competición, explica a Nós Diario que nace en 2015, debido a que anteriormente xa había un rally de históricos na Galiza que se facía na comarca de Melide. “Deixouse de facer e por iso emprendemos nós este proxecto”, apunta. Así mesmo, tamén pensa que "era necesario ter na Galiza un rally de históricos”, pois “hai moitos coches na nosa terra dese tipo e sobre todo pilotos destacados como Xesús Ferreiro, campión estatal de históricos en varias ocasións”. “Cremos que hai unha tradición máis que suficiente na Galiza de automobilismo e de históricos”, engade. Este ano, o rally contará cunha novidade: a carreira decorrerá unicamente o sábado, a diferenza doutras edicións nas que se dividía en dous días. Esta sexta feira terá lugar a cerimonia de saída en María Pita, os coches entrarán pola tarde e ás 18 horas farase só o acto. “O que é competición só é o sábado, no resto de edicións foran os dous días, pero este ano tivemos unha dificultade engadida, dado que hoxe é festivo, o de Todos os Santos, que fai que os cemiterios estean cheos de xente, e varios dos nosos tramos coinciden con algúns deles. Para evitar eses problemas tivemos que agrupar todo no mesmo día”, precisa Manel, sobre o peculiar inconveniente que os levou a mudar o formato do rally, que comeza oficialmente mañá ás 8.30 horas. Aínda así, e como todos os anos, o Rally de Vehículos Clásicos seguirá contando coas tres categorías que o conformaron na anterior edición. A primeira delas, pre 80, na que participan coches homologados até o ano 1980. A segunda, pre 90, está composta polos vehículos da década seguinte, e, por último, a categoría pre 2000, que se engadiu o ano pasado, inclúe coches homologados entre 1990 e 2001. O Dépor quere seguir facendo un "bo fútbol" para manterse un ano máis na Liga F Unha proba única O Rally Rías Altas é unha das probas máis recoñecidas en todo o Estado polo número de participantes. “É certo que este ano con respecto ao pasado baixaron un pouco as inscricións, pois na anterior edición contamos con 84 equipos e nesta baixamos a 77. Aínda así, estamos sempre nesa contorna, entre os 70 e os 90, que está moi por riba das demais probas do Campionato de España”, remarca Manel López. O realmente impactante deste éxito de participación é o hándicap que carrexa Galiza con respecto a outros territorios, dado que “aquí non hai un Campionato galego de históricos”. “Outras probas como a de Asturias teñen o seu propio campionato de regularidade, polo que ao seu evento do Campionato estatal vai moita xente da zona que corre tamén no rexional, e así suman moitas inscricións. Aínda así, nunca chegan aos nosos números”, apunta o presidente do Club Rally Rías Altas. O éxito non só se reflicte no número de participantes, senón tamén en todos aqueles afeccionados e afeccionadas que se achegan aos diferentes tramos deste circuíto para gozar dunha das mellores probas a nível estatal. “Adoita haber bastante afluencia de público, mais é certo que depende bastante da climatoloxía, xa que é un evento no que hai que mollarse e que decorre no medio do monte. Pero aínda así adoita acudir moita xente, sobre todo na saída en María Pita”, engade López. Os protagonistas A décima edición do Rally Rías Altas contará cunha participación de alto nivel da man de pilotos como os galegos Xesús Ferreiro, campión estatal de históricos en varias ocasións, e Francisco López, gañador do rally nunha ocasión. Ambos os dous agardan esta cita con moitas ganas e ilusión. “Este rally é moi especial para min porque é o único que temos aquí, a nivel estatal, puntuábel para o Campionato. É o rally da nosa casa, da nosa terra e coa nosa afección. Ademais, a relación que temos coa organización é moi boa”, salienta Ferreiro, natural de Melide. Maria de Valdés, mellor nadadora do ano: "Quero cumprir un soño: un novo ciclo olímpico e facer a miña mellor versión nuns Xogos" Para Francisco López esta proba tamén é unha das máis especiais da tempada: “Este ano decidimos volver porque o rally de aquí, da Galiza, sempre ten moitísima participación, e este ano a verdade é que vimos moi ledos porque nos gustou moito o formato. Levabamos uns anos que non nos acababa de convencer o formato que tiña, pero o deste ano, que xunta todo nun día, con catro tramos e a dobre pasada, cremos que é o máis adecuado tanto para o público como para nós”, destaca o piloto lugués. O percorrido: Rías Altas, un circuíto que namora todos os pilotos Unha das claves deste rally é o seu circuíto, pois “os tramos da competición son moi do gusto dos pilotos”, “Galiza é moi diferente neste sentido con respecto a outras zonas do Estado como Estremadura ou Canarias”, explica Manel López. O percorrido no experimenta grandes cambios en comparanza con edicións pasadas, e “máis ou menos mantéñense as mesmas zonas”, sinala. Hai catro tramos: o primeiro é Monfero, o segundo Paderne, que se repiten dúas veces o sábado pola mañá, e xa pola tarde alcánzase Aranga e o tramo de Irixoa, tamén dúas veces, acrecenta o presidente do Rally Rías Altas. “Na Galiza temos a gran sorte de contar con tramos moi bonitos e mesmo esvaradíos e sucios, que son o tipo de condicións que a min realmente me gustan. Monfero, por exemplo, é un dos tramos máis incríbeis do campionato, e témolo aquí, no rally da casa. Ao final todas as competicións do norte teñen uns tramos espectaculares, tanto os de Galiza como os de Asturias”, di o piloto Francisco López. Xesús Ferreiro tamén gaba o circuíto de Galiza, salientando que “non é nada doado, pois son tramos con moitos cruzamentos, con moitos cambios de ritmo e cun asfalto totalmente distinto”. “Iso é o que nos chama a atención, chegar a un sitio difícil motívate máis e sempre o afrontas con máis interese”, engade.