A mellor xogadora do mundo, de gañar a Libertadores no Brasil a asentarse en Castro de Rei

O FSF Castro Bloques Cando afronta a segunda volta do campionato con moitas ganas e ilusión. O conxunto da Terra Chá fixo oficial a mediados de decembro a incorporación de dúas novas xogadoras que buscan dar un notábel salto de calidade ao equipo, Júlia Melz e Camila Costa, a primeira delas porteira e a segunda á. Ambas as dúas chegan procedentes da liga brasileira, do Stein Cascavel, e de se proclamaren campioas da Copa Libertadores e do Campionato Paranaense, que rematou en decembro como é habitual nas competicións disputadas no Brasil. Mais Camila Costa non é unha fichaxe máis. Chega á Galiza, nada menos, que como a mellor xogadora do mundo, alén de máxima goleadora da Libertadores. Costa obtivo polo seu papel ao longo do ano 2023 o galardón que cada ano outorga Futsal Planet e que en 2022 recaera en Patricia González Peque, do Burela. "O meu logro individual só foi posíbel porque pertencía a un equipo moi forte, estou moi agradecida ao Stein e ás miñas compañeiras polos excelentes anos que tivemos xuntas”, apunta, en conversa con Nós Diario, a 'galáctica' incorporación do Castro. Ana Seabra, adestradora do Guardés: "Nunca pensamos en chegar líderes a 2025, mais agora queremos soñar en grande" Agora, tras esta gran tempada, a brasileira buscará novos retos na Galiza co Castro, noveno clasificado en Liga con 18 puntos após as primeiras 15 xornadas. Sobre a súa chegada á Terra Chá, a mellor xogadora do mundo afirma que, “despois de recibir a oferta do club”, falou coa súa compatriota Luisa Mayara, e ela acabouna de convencer. “Gustoume o que había e, ademais, desexaba de xogar nesta liga, que para min é das máis fortes”, asegura, e engade que o Castro ten “moito potencial para crecer, e hai boas xogadoras que están a loitar duro para fortalecerse na Primeira División”. A gardarredes Júlia Melz tamén foi galardoada nestes premios como unha das dez mellores do mundo na súa posición, e foi, ademais, unha das claves da vitoria do Stein na Libertadores, chegando a marcar na final un tanto de meta a meta. O conxunto castrexo ten apenas cinco puntos de diferenza sobre o descenso e fica a dez do play-off polo título, situación ante a que Costa di estar igualmente “motivada”. “Ao ser só catro equipos os que clasifican para o play-off, entendo que teremos unha misión difícil para achegarnos á parte máis alta da táboa, mais espero adaptarme ao equipo e poder contribuír cando antes, e quen sabe se rematar a liga no mellor lugar posíbel grazas aos nosos resultados”, recalca. Unha das principais razóns pola que a brasileira asinou polo Castro foi o feito de competir en Europa, e mais concretamente na competición ligueira do Estado español, unha das mellores do mundo: “Quero experimentala en primeira persoa, levo vendo partidos uns tres anos e sempre son moi equilibrados, o que demostra a forza da liga. No Brasil xoguei dunha forma que non sei se poderei xogar aquí, así que estou desexando que chegue a miña estrea e poder sentir o que é xogar na liga máis forte do mundo e ver como será o meu rendemento. Sei que as expectativas son xigantescas e iso motívame moito”, reitera. Certificar a permanencia, o obxectivo común de Celta, Dépor e Rácing en 2025 Unha difícil misión para a segunda volta da Liga O FSF Castro rematou a primeira volta da liga con 18 puntos e na novena posición. Unha situación relativamente incómoda para o equipo, que aínda non se ve o suficientemente afastado do descenso. Ollando cara a parte alta da táboa, o obxectivo máis próximo, que é o play-off, está a dez puntos. “Creo que fixemos un bo inicio de tempada. Nas seis primeiras xornadas enfrontabámonos aos catro primeiros e logo tiñamos dous partidos moi complicados ante Alcantarilla e Móstoles, e respondemos ben. Conseguimos seis puntos e boas sensacións. Pero despois, cando chegaron os partidos nos que tiñamos que sumar e non fomos tan fortes como debiamos, deixámonos varios puntos que se os sacásemos o equipo estaría a tiro de play-off”, sinala a este xornal Carlos Martín Rodríguez Chipi, técnico do Castro. Con todo o que esta primeira parte da tempada supuxo, o adestrador vigués conclúe que o que lles toca agora é “ser realistas e tentar fuxir cando antes do descenso para estar nunha situación tranquila”. “Temos unha segunda volta por diante moi ilusionante na que, se facemos as cousas moi ben, aínda que o cuarto posto será complicado, si que poderiamos pelexar por acabar quintas ou sextas. Se chegásemos a menos distancia sería un obxectivo máis realista, pero ao final regalamos moitos puntos”, comenta Chipi. Ademais, engade que o seu obxectivo agora mesmo pasa por “mellorar a primeira volta, facer máis puntos e logo, dependendo do que fagamos nós e as nosas rivais, pode que teñamos algunha opción”. “É complicado, mais iremos partido a partido e veremos que somos capaces de facer, e se os resultados dan algunha posibilidade, tentarémolo”, acrecenta. Ester Navarrete, maratoniana olímpica: "A sensación en París foi agridoce porque adestrara para quedar máis arriba" Ademais de meterse nas semifinais da Copa Galiza, as de Chipi conseguiron clasificar para a fase final da Copa da Raíña, que se organizará en maio na Rexión de Murcia. “Somos un rival incómodo neste tipo de torneos a partidos de un día, en competicións curtas, onde a marxe de manobra é pequena. Nese formato seremos un equipo con moita ilusión e moitas ganas; nunha liga regular é máis complicado”, sentencia. O Burela viaxa até as Canarias para buscar o triunfo no partido adiado O Burela FS disputa este sábado o último encontro da primeira volta de liga contra o Teldeportivo (12 horas, Martín Freire) que non se disputou mor dunha Champions á que finalmente non puido acudir por cuestións económicas. As mariñás ocupan actualmente a terceira posición na táboa clasificatoria a tres puntos do segundo, o Futsi Atlético Navalcarnero, e a cinco do primeiro, o Torreblanca Melilla. As de Julio Delgado enfróntanse ás fechacancelas, da competición polo que sumar unha vitoria neste encontro será de obrigado cumprimento para achegarse á cabeza da táboa. O perigo por abaixo está moi lonxe, posto que o cuarto clasificado fica a once puntos de diferenza, e se o Burela suma un novo triunfo neste encontro a distancia aumentaría a 14 puntos. A pesar da situación que atravesa o Teldeportivo, que só foi capaz de sumar 2 puntos nas 14 primeiras xornadas, as xogadoras son conscientes de que non hai ningún partido doado: “Non podemos fiarnos en ningún partido, pero sobre todo neste que vimos das vacacións. Temos que traballar forte ante un Teldeportivo que necesita puntuar, así que debemos moi estar atentas neste partido ‘trampa’", advirte a xogadora Dany Domingos. "Xogamos na súa pista e a nosa idea é dar o mellor e seguir traballando”, engade a tamén capitá do conxunto de Burela. Delgado contará con todas as súas xogadoras para este cita agás Cris Lourés, que non viaxou ás Canarias mor dunha lesión e que se une á lista de baixas canda Irene Samper.