Melania Rodríguez apunta aos Xogos Olímpicos após revalidar o ouro no Mundial

Nunha entrevista realizada por Nós Diario a Melania Rodríguez no mes de abril deste mesmo ano, a ximnasta ponteareá aseguraba que estaba disposta a "seguir facendo historia neste deporte, bater récords e lograr novas metas". A súa actuación días atrás no Campionato Mundial de Trampolín 2025 que aínda se desenvolve até este domingo en Iruña (Nafarroa) confirma que está cumprindo ese obxectivo. A deportista nada na capital do Condado vén de revalidar o título de campioa mundial de trampolín na categoría de dobre mini tramp (DMT) e agora está disposta a asumir novos retos, entre eles sacar a espiña dunha medalla nuns Xogos Olímpicos e é consciente de que a próxima cita será na cidade norteamericana de Os Ánxeles 2028. "Aínda non sabemos exactamente como será a clasificación olímpica, mais eu creo que será semellante ao ciclo anterior", apunta en declaracións realizadas a Nós Diario. Con todo, ten a seguridade que lle dá a experiencia de que "o Mundial de 2027 será unha das probas que conten para esa clasificación e tamén agora algunhas copas do mundo". Até que chegue ese momento confirma que está centrada "en adestrar e mellorar día a día para que cando chegue o momento podelo facer da mellor maneira posíbel". A ximnasta galega Melania Rodríguez proclámase campioa mundial de trampolín en dobre mini tramp Levar a presión Após case 20 anos dedicada á ximnasia, a súa traxectoria deulle a experiencia necesaria para afrontar os grandes desafíos que ten na actualidade a alta competición. Se o seu anterior ouro na modalidade de dobre mini tramp foi en Birmingham (Reino Unido) as desta semana decorreron na proximidade e cunha gran presenza do seu público. "Tiven bastante presión, porque todo o mundo esperaba que revalidara o título. A xente que veu ao mundial agardaba moito de min", recorda a ponteareá. Por iso a súa opción foi "facer a miña competición e xa veremos a ver que pasa, deixar de pensar no ouro, na medalla, e pasar a facer o meu traballo”. Esa "preparación mental" foi quen de transformar a presión para levala ao seu terreo. "Dinlle a volta, escoitei berrar o público e vinme arriba", conta aínda con entusiasmo. A estratexia non xurdiu da nada e ten que ver cos cinco anos que leva traballando a fondo cunha psicóloga deportiva especializada. "É o mellor que me pasou na vida, axúdame a xestionar todo este tipo de situacións", admite. A outra medalla Alén do ouro, Melania tamén trae para Galiza un bronce na proba que realizou por equipos, un metal que afirma lle fai "moita ilusión” por participar cun grupo co que leva desde 2021 competindo. "Nunca nos metemos nunha final nesta modalidade e poder estar na pista con elas dúas [Marta López e Loreto Tuñón] foi absolutamente incríbel", explica. "Pasase o que pasase, estar na final xa era un posto seguro na historia, polo que fomos en todo momento moi tranquilas e aínda por riba despois chegou o bronce", agrega. Ademais, recoñece que gañar este metal foi algo especial "por poder compartilo con Marta López, que é a miña compañeira de adestramento todos os días, e con Loreto". A táctica A final en Iruña non foi doada. A propia ximnasta ponteareá recoñece que non lembra en toda a súa carreira unha cita igual onde "ningunha das rivais fallaba na súa quenda". Diante tiña unhas vellas coñecidas no circuíto mundial: a británica Kirsty Way, a estadounidense Kennedi Roberts e a rusa que competiu como Atleta Internacional Neutral, Galina Begim. Melania Rodríguez, ximnasta: "Quero seguir facendo historia neste deporte, bater récords e lograr novas metas" Cada campionato é un mundo e este non foi diferente. "Hai moitas opcións cando están nun campionato deste nivel e moitas veces todo depende do sorteo e a orde en que salten", sinala Melania Rodríguez. A ximnasta do Condado optou, desta vez, por "marcar o nivel" e "arriscar" co seu triplo en carpa. "Podía agardar mais sempre tiven a miña estratexia clara e ir por diante para que fosen elas as que decidiran que saltos tiñan que facer", aclara a Nós Diario. Así, sacou do seu amplo repertorio o salto máis difícil e tamén o de máis puntuación que, en definitiva, foi o que lle deu a posibilidade de subir ao máis alto do podio. Os outros retos "A verdade é que toda a miña vida xirou ao redor sempre da ximnasia, non o cambiaría por nada, deume moitas alegrías, para min este deporte é todo", sinala a Nós Diario. Por este motivo repasa o calendario nas súas especialidade e nel, alén dos Xogos Olímpicos de 2028, Melania Rodríguez tamén pensa nos Xogos Mundiais, unha cita importante para todas as disciplinas deportivas que, polo de agora, non entran no formato olímpico. "Nesa cita entraría o dobre mini tramp, sincronismo e non estou segura se tamén estará o tumbling", explica a deportista do Condado. Polo de agora non hai información de como será a clasificación para poder estar presente nin se haberá cambios normativos e prefire centrarse no obxectivo de 2028 "para despois ver como se desenvolve esa outra cita".