Jaime Duro e Estefanía Fernández gañan o último selectivo estatal
O Selectivo estatal de Sprint Olímpico concluíu esta sexta feira no Encoro do Pontillón, na pontevedresa parroquia de Verducido, coa disputa das catro regatas selectivas para disputar os 5.000 metros con portes para estar nas Copas do Mundo tanto en C1 como en K1. A representación galega mostrou o bo momento do Club Fluvial de Lugo coa vitoria de dous dos seus deportistas: o pontevedrés Jaime Duro Pichel e a padexeira de Mérida, Estefanía Fernández González.
A primeira das regatas, o C1 5000 feminino, deuse nun man a man entre Nerea Novo (Club Náutico Pontecesures) e María Martín. Após as dúas primeiras voltas onde a igualdade foi total, a de Valga non foi quen de evitar distanciarse para concluír en segunda posición marcando un 29:41,32, gañando Martín con 28:42,43.
A carreira galega
Foi na quenda seguinte, a do C1 5000 masculino, onde chegou a primeira vitoria galega. Iso si, os tres padexeiros participantes eran do país: Noel Domínguez (Club Fluvial Lugo), Jaime Duro (Club Fluvial Lugo) e Manuel Garrido (Club Kaiak Tudense). Após unha primeira volta de máxima igualdade, as noticias chegaban coa retirada de, primeiro, Noel Domínguez e, segundo, Manuel Garrido, deixando a carreira liquidada no primeiro terzo de regata. Jaime Duro, que só tivo que loitar contra si mesmo desde a terceira volta, cruzou a meta marcando 24:28,52.
Despois tivo lugar unha das carreiras da mañá coa disputa do K1 5000 feminino, que levaría á liña de saída a Estefanía Fernández (Club Fluvial Lugo), Begoña Lazkano, Miriam Vega e Eva Barrios. As padexeiras brindaron un espectáculo de nivel e moi igualado que rematou coa vitoria de Fernández.
Para rematar, no K1 5000 nin os padexeiros do Club Piragüismo Rías Baixas-Boiro, Brais Sánchez e Izan Aliaga, nin Antonio Palmas (Club Piragüismo Vilaboa) se achegaron, ao gañador, Javier López.
