Historia inacabada do deporte galego: "Novos deportes e paradigmas deportivos"

Julia Benedetti naceu no século XXI e, aínda así, é tamén unha pioneira do deporte galego. A skater galega estreouse nos Xogos Olímpicos de Toquio na modalidade de skateboarding con tan só 16 anos, e despois dunha traxectoria fulgurante que lle permitiu conseguir o billete olímpico tras brillar en competicións internacionais ante rivais, case todas profesionais, de Estados Unidos, o Brasil ou o Xapón sorprendidas polo ‘flow’ da galega, quen comezou a patinar con 10 anos e con 12 ou 13 xa competía nos campionatos de España. Sobre rodas van tamén no roller derby, un deporte de contacto, velocidade e estratexia orixinado nos Estados Unidos nos anos 20-30 e que rexurdiu con forza chegado o século XXI e chegou ao Estado español na segunda década dos 2000. Na Galiza foron As Brigantias Roller Derby as que encabezaron a revolución sobre patíns, creando un equipo para o cal tiraron das redes sociais para atraer talento a un deporte que aposta polo compañeirismo, a tolerancia, a autoxestión e o feminismo como valores fundamentais. Historia inacabada do deporte galego: "As canastras con máis sabor galego" A popularización desta disciplina vai con tanta velocidade como as súas xogadoras sobre a pista ovalada e xa contan, ademais de cun campionato da Galiza, cunha liga galega, protagonizada polos catro equipos que conforman, polo de agora, o panorama no país: As Brigantias e o Roller Derby Irmandiñas da Coruña, as Sereas Bravas de Vigo e as Jabatas de Ourense. Feminismo e tolerancia Os valores de feminismo e tolerancia que abandeira o Roller Derby son tamén precisamente os que busca o deporte galego en xeral, convertendo cada unha das modalidades deportivas no escaparate para empoderar as mulleres e para impulsar os dereitos do movemento Lgtbiq+. Bo exemplo disto, coa súa parte negativa pero, como sempre no deporte, coa súa aprendizaxe positiva, é o de Antía Fernández, xogadora de voleibol do Calasancias B da Coruña, que se converteu en 2016 na primeira deportista trans en debutar nun equipo. Historia inacabada do deporte galego: "Os récords das atletas galegas" Ela mesma recoñecía pouco despois de estrearse que tiña un dobre sentimento, de ledicia por lograr a integración e de tristura por ver até onde alcanzaba a exclusión das persoas trans. A mesma balanza de sentimentos viviron as ex futbolistas do Deportivo Tere Abelleira e Patricia Curbelo quen, tras facer pública a súa relación, recibiron insultos cargados de odio a través das redes sociais. Porén, a estes seguiulles unha onda de solidariedade aínda maior, demostrando que a tolerancia remata por vencer tamén no mundo do deporte. O motor, paixón galega Na Galiza existe unha grande afección polo mundo do motor, unha modalidade que ten reportado moitos éxitos ao deporte galego. Tanto é así que desde hai máis de 40 anos o Rally San Froilán, puntuábel para o Campionato Galego de Rallys e tamén coñecido como Rally de Lugo, congrega os mellores coches e pilotos do país, tornando ademais en todo un acontecemento que xera un importante retorno económico. Tamén sabe o que son os meles do éxito no mundo do Rally Sergio Vallejo. Tres veces gañador do Rally de San Froilán, o ‘Lobo de Meira’ é o piloto que máis probas disputou no Campionato de España, do que foi dúas veces campión e tres subcampión, obtendo os seus primeiros éxitos defendendo as cores da histórica escudaría Miño-Lugo, que leva desde 1969 traballando nun mundo tan difícil como competitivo. Historia inacabada do deporte galego: "Deportes autóctonos" Mais, se de dificultade falamos, a proba raíña é o Rally Dakar, na que o único galego que finalizou a edición de 2021 foi o monfortino Eduardo Iglesias, quen non só puido estar competindo en Arabia Saudita, senón que finalizou no posto 53 despois de 7.600 quilómetros de carreira. Moito menos tempo leva rodado o novísimo Jorge Prado, o que non impediu que con apenas 20 anos este lucense sexa a sensación internacional do motocross, debutando no mundial con 15 anos e proclamándose campión na categoría MX2 sendo aínda menor de idade. O seu próximo obxectivo é a clase raíña, a MXGP, da que é un dos máximos favoritos non só para facerse co título, senón para marcar unha era.