O Atlético Guardés sumou un valioso punto en Gran Canaria. Fíxoo a base de fe e de moito balonmán, porque a falta de cinco minutos perdía por dous tantos fronte a un Rocasa demoledor no lanzamento exterior, comandado por unhas Mbengue e Gomes que entre as dúas anotaron 21 goles.
Non obstante, Paula Arcos tamén exhibiu o seu alto nivel, propiciando a exclusión da devandita Mbengue.
Grazas a iso o conxunto miñoto xogou en superioridade os últimos compases do choque, momento no que anotou o gol que outorgaba o empate a 34 e o punto ao equipo guardés.
Xunto a ela, os oito tantos de Pessoa e os seis de Carla Gómez -ademais dun inmenso final de partido de Carratú na portería- axudaron a rescatar un resultado positivo dunha das pistas máis difíciles da Liga Guerreiras Iberdrola.
E se o final foi frenético, non menos o foi o inicio, pois ao descanso chegouse cun resultado de 19-18 que ben podería ser o marcador total en calquera outro choque.
Logo da reanudación, a escuadra canaria aumentou a súa vantaxe tras un parcial de 2-0 que fixo temer o peor para os intereses galegos, pero a velocidade de Sancha e a determinación de Sandra Santiago apareceron para contribuír ao esforzo de Paula Arcos, coas mans atadas a causa da defensa mixta que padeceu ao longo de case todo o segundo acto.
Non obstante, e por sorte para o Guardés, a internacional alacantina pode achegar de moitos modos, como demostrou logo do cambio táctico de José Ignacio Prades, que a situou no avanzado dunha estratexia 5:1.
Logo desta modificación, o Rocasa xa non estivo tan cómodo, e os brillantes derradeiros cinco minutos de Arcos traducíronse nun valioso punto nunha das pistas máis difíciles da categoría co que as da Guarda se despiden da Liga até o vindeiro ano 2022.
