A Galiza volve coroar o oitavo cumio do mundo

O cumio do Manaslu (Nepal), a oitava montaña do mundo pola súa altura de 8.163 metros, volve ser noticia na Galiza. Este pico do Himalaia acolleu a primeira expedición estatal a un oitomil, tamén con participación galega a cargo de Jerónimo López, mais fracasou e houbo que agardar a 1975 para coroar a cima. Agora é o lugués Roberto López, do Club Xistra de Vigo, quen consegue a fazaña e entra, desta maneira, no grupo de deportistas da Galiza que supera a mítica cifra. A súa é unha historia de perseveranza. Horas despois de chegar ao aeroporto de Peinador procedente de Kathmandú e facer escala en Dubai, atende a Nós Diario aínda coa emoción no corpo. “É difícil describir con palabras o que se sente ao alcanzar un cume así, e de feito, para o meu, neste non puiden gozala como me gustaría porque era unha situación moi perigosa, delicada e con outras persoas que nunca sabes o que van facer”, relata. O montañismo galego abre as fiestras A expedición ao Manaslu Para chegar a coroar o Manaslu, López tivo que seguir todo o proceso habitual das expedicións ao Himalaia. “Hai que sacar con moita antelación o permiso de acceso ao Parque Natural dos Annapurnas para poder estar no campo base”, relata o deportista, “logo tes a parte da loxística para trasladar o equipo, de máis de 40 quilos, en animais desde Kathmandú”, engade. Xa no campo base contou cun sherpa para a ascensión e comezou a subir aos diferentes campamentos para aclimatarse. “O campo 1 está a 5.500 metros, uns 800 metros mais alto que o campo base, fíxeno un par de veces para despois pasar ao 2, a 6.200 metros e de maior dificultade pola cantidade de fendas que hai no camiño”, explica. Despois tocoulle o campo 3, a 6.800 metros, montado entre unha gran fenda e un muro con enormes estalactitas de xeo. “O campo 4, o último, está a 7.400 metros e é moi desagradábel, ventoso e inhóspito”, indica, “desde ese punto saín con Anish Sherpa cara o cumio”, engade. O montañeiro lugués lembra unha ascensión final de noite “e con moito frío”. Recoñece que non lle gusta a escuridade “mais o amencer foi espectacular”. Pasou polo que se pensaba hai anos que era o cumio da montaña, un erro que motivou agora “que moitas persoas repitan para chegar ao auténtico pico que ten 60 metros máis”, conta López. No máis alto, o deportista galego estivo pouco tempo pola espazo pequeno que hai na parte alta “e as quendas de deportistas para subir e baixar nun lugar onde só podiamos estar dúas persoas”. Aprender alpinismo pode ser un xogo Montañeiro en progresión Este alpinista explica que se iniciou neste deporte hai 35 anos “como a maioría neste país: no Courel e en Trevinca”. Despois, de maneira “natural”, visitou con frecuencia os Picos de Europa e os Pireneos para rematar viaxando a Marrocos os Alpes. “En América, nos Andes, fixen picos como o Aconcagua (a, 6.961 metros), Ojos del Salado (6.893 metros)”, sinala, “e en Alaska o McKinley (6.190 metros), este último xunto ao malogrado Abel Alonso”, engade. Pasou dos setemil con montañas como o Pico Lenin (7.134 metros) e en 2022, coa idea de aclimatarse ao Himalaia, subiu o Island Peak (6.165 metros). López recoñece que non todas as ascensións son iguais. “Hainas algunhas máis complicadas que outras, desde aqueles que chegas ao final só con bastóns e crampóns até os que tes que saber manexar cordas ou saber escalar en xeo”, asegura. Por este motivo considera que a preparación física e técnica “é esencial”. Axudar sen moitas axudas O Club Xistra foi o primeiro en parabenizar ao seu socio e dar a noticia. Para o presidente da entidade, Enrique Freixeiro, a fazaña, como explica a Nós Diario, é “un fito significativo na traxectoria do club, xa que é a primeira vez que un dos nosos membros alcanza un cume desta envergadura no Himalaia”. López agradece a axuda que lle prestaron para poder realizar a expedición. “Contei co seu apoio económico, algo moi difícil neste deporte onde non é fácil atopar patrocinios”, sinala o montañeiro. O lugués é Deportista de Alto Nivel Galego (DGAN), a única axuda da Xunta da Galiza, unha Administración que non participou nesta campaña. Xavier Carballo, a promesa galega que parte da escalada deportiva Porén, a iniciativa deportiva contou tamén co seu apartado social e López conseguiu levar até esa zona do Nepal diñeiro e material para colaborar coa poboación. "Nesta ocasiónmiña intención foi axudar na escolarización dalgunhas nenas e nenos con problemas ", explica, "é o mínimo que podemos facer as expedicións que visitamos este territorio do Nepal", conclúe o montañeiro lugués.