Galiza ten xa 1.555 deportistas no alto nivel, 12 delas son vitalicias
O Diario Oficial da Galiza publicou esta sexta feira a orde pola que se recoñecen as persoas deportistas de alto nivel (DGAN), alto rendemento, rendemento deportivo de base e vitalicias, persoas adestradoras ou técnicas, xuízas e árbitras recoñecidas de alto nivel, e relaciónanse as solicitudes desestimadas e a causa.
No momento actual, o número total de deportistas galegas e galegos recoñecidos e recoñecidas segue batendo récords e chega xa a 1.555, sendo 650 mulleres (42%) e 905 homes (58%). Arredor de 77%, un total de 1.202, son deportistas de alto nivel (507 mulleres e 695 homes).
Ademais, hai 146 deportistas de rendemento deportivo de base (67 mulleres e 79 homes); 127 deportistas de alto rendemento (52 mulleres e 75 homes); 45 técnicos de alto nivel (cinco mulleres e 40 homes); 23 árbitras e xuízas (catorce mulleres e nove homes); e doce deportistas galegos de alto nivel que son vitalicios (cinco mulleres e sete homes).
DGAN vitalicio
No grupo de DGAN vitalicios recoñécese o 'top' do deporte galego. É o caso en piragüismo de Carlos Arévalo, Carlos Pérez 'Perucho', Teresa Portela e Cristian Toro; en vela o de Támara Echegoyen, Nico Rodríguez e Sofía Toro; no atletismo adaptado, o de Adi Iglesias; no paratríatlon Susana Rodríguez; en natación adaptada Chano Rodríguez; e en boxeo Enmanuel Reyes.
Nesta resolución súmase agora tamén o tirador paralímpico Juan Antonio Saavedra. Cómpre salientar, asemade, que entre todas as categorías recoñécense 46 deportistas galegos e galegas (15 mulleres e 31 homes) con diversidade funcional, o número máis alto da historia.
