Galiza domina no fútbol sala feminino con tres representantes nas semis da Copa

O fútbol sala galego segue dominando o panorama estatal con até tres conxuntos da Galiza nas semifinais da Copa da Raíña. O FSF Castro Bloques Cando, tras superar con comodidade o Teldeportivo, disputará por primeira vez na súa historia unhas semifinais nesta competición contra o líder da liga, o Torreblanca Melilla. Pola súa parte, o CD Burela FS, que xa sabe o que é gañar esta copa nun total de seis ocasións, levou os cuartos de final no derbi galego contra o Ourense e volverá disputar unhas semifinais co obxectivo de sumar o seu primeiro título da tempada. Nas semifinais agarda outro equipo galego, o Poio Pescamar, que foi o último conxunto en certificar o seu pase tras vencer o STV Roldán nun encontro moi igualado. O primeiro semifinalista da Copa da Raíña 2025 coñeceuse xa pola mañá. O FSF Castro Bloques Cando certificou o seu favoritismo nos cuartos de final cun contundente triunfo por 4-0 fronte ao Gran Canaria FSF Teldeportivo. O conxunto dirixido por José Carlos Martín 'Chipi' logrou unha clasificación histórica, pois será a primeira vez que o equipo de Castro de Rei (A Terra Chá) dispute unhas semifinais desta competición estatal. O Noia sabe impor o seu dominio e proclámase campión da Copa Galiza As castrenses comezaron o encontro algo incómodas, quizais polo horario ou por ser a primeira eliminatoria do día, pois custoulles entrar no partido e crear perigo sobre a meta rival. Co paso dos minutos, as galegas fóronse asentando mellor, e tras unha boa xogada de estratexia nun saque de banda, Jenny inaugurou o marcador cun potente disparo ao pau. Pouco antes do descanso, e tras unha boa ocasión das canarias, que lograron xerar un par de momentos de perigo sobre a meta que defendía Area, o equipo castrense ampliou a vantaxe cunha rápida transición ofensiva que culminou Laura Boix enviando o balón ao fondo da rede. O paso polos vestiarios sentoulle ben ao Teldeportivo, que saíu cunha grande intensidade, xerando un par boas ocasións nos primeiros minutos. O Castro sufriu, pero mantivo o seu estilo, movendo o balón con criterio para superar a presión alta do rival e deixando que o tempo xogase ao seu favor. A isto sumouse a excepcional actuación defensiva de Camila Costa, que se mostrou inconmensurábel ao longo da segunda metade. Xa nos minutos finais, no 32, tras unha arriscada saída da gardameta canaria Mariona, Julia Melz recuperou o balón e, desde a súa propia área, anotou o terceiro tanto que deu tranquilidade e confianza ao equipo. A falta de tres minutos para o final, Camila culminou o seu excelente partido cun roubo e un gol que sentenciou o encontro co definitivo 4-0. O Burela levanta a súa oitava Copa Galiza nunha final de infarto que se decidiu nos penaltis Burela - Ourense O campión de cinco das últimas seis Copas da Raíña xa está nas semifinais. O CD Burela FS levou o primeiro dos derbis galegos que se van dar nesta fase final contra o Ourense Ontime. As guerreiras laranxas chegaban a este enfrontamento como favoritas e souberon impor o seu dominio para vencer as ourensás por cinco goles a cero. A maiores do fútbol sala, as xogadoras do Burela quixeron facer unha reivindicación pola situación económica que está a vivir o club tras a saída do seu patrocinador principal, Pescados Rubén. As xogadoras saíron á pista do Pazo dos Deportes de Murcia tapando o escudo, o cal tamén ocultaron na foto protocolaria antes do inicio do partido. Coas protagonistas xa sobre o 40x20, deron comezo os primeiros cuartos de final da tarde cunha grande intensidade. Burela tivo un inicio un tanto complicado, provocado en parte polo bo facer do equipo ourensán, que aproveitou varios erros na saída do conxunto mariñán para ameazar a meta defendida por Caridad, que tivo moito traballo nos primeiros minutos. Co paso do tempo, o Burela comezou a coller ritmo e a gozar de boas oportunidades, até que no minuto 8, Dany, tras unha gran acción individual, abriu a lata cun disparo lonxano pegado ao poste. Tras o gol, ambos os conxuntos xeraron perigo nas áreas rivais, pero unha gran primeira metade tanto de Caridad como de Sara Soares evitou que o marcador fose a máis. Mais antes de rematar o primeiro tempo, e a catro minutos do final, o técnico laranxa, Julio Delgado, pediu un tempo morto para axustar o equipo e, tras saír á pista, Dany conseguiu chegar co balón á liña de fondo e puxo un centro á área que rematou Carolina Pedreira coa cabeza a pracer para anotar o segundo tanto da eliminatoria. O Burela foi ao descanso cunha vantaxe de dous goles, pero con certa intranquilidade debido ao gran primeiro tempo das ourensás. De feito, o inicio da segunda metade comezou case do mesmo xeito, cun Ourense intenso e agresivo que logrou facer moito dano na pista rival pero sen atopar o premio do gol. Tras tanto insistir, foi finalmente o Burela quen anotou o terceiro do encontro nun contragolpe que iniciou e que culminou Débora. Isto supuxo un xerro de auga fría para as de Carlos Navarro, que souberon sobreporse ás adversidades tratando de recortar distancias para seguir vivas na eliminatoria. A diferenza no marcador fixo que tivesen que arriscar un pouco máis, polo que a súa gardameta, Sara Soares, exerceu como quinta xogadora para ter superioridade numérica en pista rival. Pola súa banda, as de Julio Delgado aproveitaron cada posesión para espremela ao máximo e facer que o tempo correra ao seu favor. Até que, nos últimos minutos do encontro, Carlos Navarro apostou polo xogo de cinco con Judith como porteira-xogadora, que non acabou como esperaban, posto que Emily aproveitou un rexeite, e que a meta estaba baleira, para anotar o cuarto desde a súa propia pista. Para rematar a festa, o Burela fixo o quinto por medio de Patricia, tras unha transición rápida cun gran saque en longo de Caridad. Con isto, as mariñás lograron outra clasificación máis ás semifinais e outra oportunidade para conseguir o seu primeiro título do curso. Poio imponse nos penaltis ante o STV Roldán Poio Pescamar foi o último equipo do día en confirmar o seu pase ás semifinais. As de López Tulla impuxéronse na quenda de penaltis ao STV Roldán, nun partido digno dunha fase final da Copa da Raíña. Xa desde os primeiros minutos puido notarse a tensión e a igualdade existente entre ambos os equipos. De feito, o primeiro tanto do encontro non chegaría até o minuto 7, nun saque de banda que, por erro, marcou Martita en propia porta. Tras o gol, o conxunto galego meteu unha marcha máis e logrou o empate, por medio de Laura Uña, a catro minutos de chegar ao descanso. A igualdade entre ambos os conxuntos foi tan grande que o marcador non se moveu na segunda metade e a eliminatoria tivo que decidirse na quenda de penaltis, na que unha actuación estelar de Elena baixo paus deulle o pase ao Poio ás semifinais.