Piragüismo, vela e remo son tres das disciplinas que máis alegrías teñen deparado á afección galega tanto a nivel estatal como continental e mesmo olímpico.
Ao mesmo tempo en que na localidade húngara de Szeged unha ampla Armada Galega intentará demostrar o seu poderío nunha Copa do Mundo que se estenderá ao longo de toda a fin de semana, na Galiza terá lugar a Copa de España 420 de vela.
Concretamente, a sede dun certame que comezará o próximo sábado día 13 de maio e rematará na véspera do Día das Letras Galegas, o 16, será o Centro Galego de Vela, en Vilagarcía de Arousa.
Alí medirán forzas os nomes máis potentes dunha das modalidades mais relevantes a nivel internacional, xa que é a antesala da vela olímpica de barcos dobres, onde a Galiza conta con grandes campións e campioas como Nico Rodríguez (470) ou Iago López, a pioneira Támara Echegoyen ou Patricia Suárez (49ers).
En Vilagarcía tomarán a saída 60 deses barcos dobres, dos que arredor dunha ducia serán galegos, o que significa unha participación dunhas 24 regatistas do país, entre as que destacan Natalia Domínguez e Inés Ameneiro, quen xa saben o que é conquistar un título estatal, pois veñen de subir ao máis alto do podio no Campionato de España Sub-17.
Importante regata en Noia o 30 de setembro
Cambiando a vela polo remo, a Federación Española da modalidade oficializou o calendario da Liga de Remo de Mar 2023, que nesta ocasión está conformada por seis regatas, das que unha terá lugar na Galiza.
Será, concretamente, en Noia entre o 30 de setembro e o 1 de outubro, penúltima parada dun certame que concluirá dúas semanas despois en Castropol (Asturias).