Gala Mestres, capitá do Baxi Uni Ferrol: "Estamos construíndo un novo equipo, non nos comparamos co que fixemos a tempada pasada"

—Que agardan da nova campaña? É difícil imaxinar un éxito igual ou superior ao da pasada, na que foron subcampioas da Eurocup? Viñeron cinco xogadoras e somos un equipo con xente moi nova. O ano pasado vivimos unha tempada histórica, na que desfrutamos moitísimo, pero digamos que empezamos de cero a construír as nosas bases e o noso obxectivo é manternos na Liga Endesa e, a partir diso, todo o que veña será benvido. Non creo que nos esteamos comparando co que fixemos o ano pasado nin que o noso obxectivo sexa repetilo. —Debutan na casa contra o València, o vixente campión da Liga. Vense con posibilidades de empezar con bo pé a competición? Non che vou mentir, foi unha pretempada na que tivemos algunhas baixas por lesións, Bego de Santiago estivo na China dez días coa selección de 3x3... e ao final foi un pouco incómoda, polo que é certo que este primeiro partido, aínda por riba contra o València, penso que vai ser un encontro para seguir crecendo nós, que ao final é en quen temos que centrarnos. Seguramente o València non xogue na 'nosa liga' e eu penso que hai que afrontalo así. —Na Eurocup comezarán esta nova andaina ante o Benfica. Que destaca das súas rivais? Precisamente ese si que é un partido importante para nós, porque xa é a fase de grupos. Eu creo que na Eurocup nos tocou un grupo no que podemos competir contra todos os equipos e mesmo gañarlles. Hai que ser conscientes dos partidos nos que queremos competir e nos que queremos traballar máis cousas para ir crecendo, entón o do Benfica, a pesar de que non estudamos individualmente as xogadoras, si que cremos que é un enfrontamento no que podemos competir e gañar. —Que papel xoga o técnico, Lino López, dentro do vestiario? Lino ten un papel moi importante como adestrador, el ao final é quen leva o barco. Para nós é importantísimo, temos un xogo moi particular e, por iso, temos que crer todas no que el manda para que as cousas saian ben. Necesítase a concentración de todo o mundo e el ten que estar diante, xa que é a peza máis importante. —Este ano contan con algunhas caras novas no vestiario, que tal se están adaptando? Moi ben, a verdade. O ano pasado a pretempada foi moi curtiña porque tivemos os clasificatorios da Eurocup e este ano puidemos facela dun mes e unha semana, e isto facilita que a xente comprenda o sistema que quere Lino. Estámolas axudando o máximo posíbel e eu creo que se están adaptando moi ben. Ao final, arróupante moito tanto o club como a cidade e a xente estase sentindo moi ben aquí. —Nun plano máis persoal, como afronta vostede esta nova tempada? É difícil manexar a presión de ser a capitá do grupo? Non, non teño moita presión, ao final o concepto de capitá é só o nome, eu non teño moitas máis cousas que facer. Intento dar o máximo cada día, iso é certo, e ir adestrar con todo, xa que é alí onde melloramos. O meu obxectivo é intentar que o equipo chegue o máis lonxe posíbel nas dúas competicións —Liga e Eurocup—, como xa o fixemos o ano pasado, e a partir de aí desfrutar de cada partido. Eu creo que o ano pasado foi moi bo tamén por iso, porque se nos viu desfrutar moitísimo a todas as xogadoras e o final é o importante, é o que quere a xente e é polo que ven a vernos, para desfrutar con nós. Para min o obxectivo principal é este, chegar alto co equipo e poder desfrutar cada momento. —Cre que podería esta tempada superar as cifras da pasada? Diríache que xa o teño nun segundo plano, xa teño unha certa idade. O meu primeiro ano tiven mellores estatísticas e o pasado non tan boas, mais é certo que a nivel de equipo si me sentín moito mellor. Intento axudar noutras facetas. Ás veces como tiradora ou como anotadora non tes un bo ano ou uns bos momentos, e eu o que intento é axudar nos básicos, xa sexa no rebote ou noutra cousa, O obxectivo é sempre axudar na cancha ao equipo. —Esta vai ser a súa terceira tempada en Ferrol. Quédalle algún soño por cumprir no Uni? O que cheguei a desfrutar o ano pasado nunca o puidera imaxinar. Non só chegar até a final, senón percorrer todo ese camiño foi algo único, polo que che diría que non, que non teño unhas expectativas moi altas porque sei que sempre nos imos sorprender. Os equipos de Lino o bo que teñen é iso, que sempre sorprenden sexa co que sexa; veremos que pasa este ano. —E máis alá do Uni Ferrol, que obxectivos ten? Non sabería dicirche. De momento estou centrada nisto, que é o baloncesto, e pouco máis, a verdade. —Vese xogando moitos máis anos en Ferrol? Ferrol é unha cidade na que estou moi cómoda. Síntome moi arroupada pola xente do club e en xeral da cidade. Cada ano estou máis a gusto e agora mesmo non entra na miña cabeza marchar a ningún outro sitio. Non sei dentro dun tempo, pero agora estou moi ben aquí e gustaríame seguir. A saúde mental e a (case) retirada temperá de Gala Mestres Gala Mestres promove nas súas redes sociais unha campaña chamada "Sentir la camiseta" na que fala da saúde mental. Unha cuestión que, como ela mesma sinala, "segue sendo tabú, pois hai moitos temas dos que desgraciadamente a xente aínda non fala en voz alta". A que foi MVP da Liga Challenge, categoría de prata do baloncesto feminino estatal, afirma que a profesión de deportista é distinta ao resto e que moitas veces se require da axuda de profesionais. No Baxi Uni Ferrol dispoñen dunha psicóloga que as acompaña en todos os adestramentos e que sempre está aberta a poder tratar calquera problemática que xurda, e Mestres destaca o positivo disto tanto a nivel individual como colectivo. No seu caso, lembra como na súa xuventude lle era máis complexo xestionar emocións e vivencias, o que fixo que aos 18 anos tomase a decisión de deixar o baloncesto durante un ano debido a que non recibía del o que ela quería, sobre todo tras pasar por situacións de incomodidade coa selección estatal. "Quizais, se daquela tratase con algún psicólogo deportivo antes non chegaría até o punto de querer deixalo, pero por sorte todo saíu ben e aquí estou", salienta a xogadora do Uni Ferrol.