Fecha un movido mercado para o fútbol: estes son os cambios nos equipos galegos

Esta segunda feira fechou o mercado de fichaxes de inverno no fútbol galego con importantes movementos nos cadros de xogadores e xogadoras dos principais clubs da elite. Celta, Racing, Deportivo e Deportivo feminino realizaron importantes axustes para facer fronte ás exixencias do que resta de tempada, na que buscan lograr os seus respectivos obxectivos. Renovación en Balaídos O mercado fechou esta segunda feira en Vigo cun movemento inesperado de última hora. Tasos Douvikas, que xa manifestara semanas atrás o seu deseo de abandonar o club ante a falta de minutos, acabou recalando no Como da Serie A italiana a cambio dunha contía que se achegaría aos 14 millóns de euros. O director de Fútbol, Marco Garcés, tamén conseguiu liberar unha das fichas máis altas do equipo, a de Jonathan Bamba. O xogador marfileño, que chegou como unha das grandes apostas do Celta na ‘era Benítez’, nunca conseguiu ofrecer o rendemento agardado tras a súa boa etapa no Lille. Despois de apenas un ano en Vigo, e para reducir a masa salarial do equipo, Bamba foi traspasado ao Chicago Fire por arredor de 3 millóns de euros. A súa saída supón un alivio económico para o Celta, que necesitaba axustar os seus números para cadrar o orzamento ao remate do presente curso. O Celta tamén viu saír dous xogadores cedidos. O mediocentro estadounidense Luca de la Torre fixo as maletas para xogar no San Diego do seu país natal, onde tentará atopar continuidade e minutos despois de non conseguir afianzarse en Balaídos. O arxentino Tadeo Allende, que non tivo moitas oportunidades no Celta, foi cedido ao Inter de Miami, onde se estreou con gol no seu primeiro partido amigábel. Tamén abandonou o vestiario celeste Joseph Aidoo. Despois dunha longa lesión que o mantivo afastado dos campos, o central ghanés non puido facerse un oco na actual tempada. Aidoo foi cedido ao Valladolid, un rival directo na loita pola permanencia –primeiro e indispensábel obxectivo antes de empezar a ollar cara aos postos europeos–, onde buscará recuperar a súa mellor versión de cara ao futuro. E, por último, Carlos Dotor rescindiu o contrato de cesión co Oviedo para marchar, de novo a préstamo, ao seu gran rival, o Sporting de Xixón... e debutar con gol e vitoria. No capítulo das chegadas, o Celta incorporou o prometedor extremo noruegués Jones El-Abdellaoui, de 18 anos, que firma contrato até 2029. O atacante, internacional nas categorías inferiores de Noruega, destacou na pasada tempada na Segunda División do seu país, anotando 13 goles e dando 4 asistencias en 26 partidos. Na súa presentación co filial –que alternará co primeiro equipo–, El-Abdellaoui mostrou a súa velocidade, calidade no un contra un e atrevemento, o que fai presaxiar boas perspectivas para o futuro. A outra incorporación do Celta foi Iker Losada, ex canteirán cedido polo Betis. O mediapunta de Catoira, que non tivo oportunidades en Sevilla esta tempada, chega a Vigo coa confianza de Claudio Giráldez, co que traballou na etapa no filial. Losada, que destaca pola súa visión de xogo, capacidade de asociación e boa pegada, buscará volver á súa mellor versión e facer valer esas cualidades no equipo. Adeus ao capitán no Racing No Racing de Ferrol, o mercado de inverno tamén foi axitado. O club, que está a vivir unha tempada moi diferente á do ano pasado, cambiou de adestrador, e Alejandro Menéndez substituíu Cristóbal Parralo. Menéndez, coñecido polo seu paso polo Celta, terá a difícil tarefa de salvar o Racing do descenso. Durante este inverno o Racing perdeu varios xogadores por rescisión de contrato. O primeiro foi Moi Delgado, que marchou ao Huesca despois de que as súas lesións lle impedisen ter continuidade no equipo. Tamén saíu Julián Delmás, lateral dereito que apenas tivo minutos e que fichou polo Cartagena, equipo rival na loita pola permanencia. Outro nome que abandonou a cidade dos estaleiros foi Bebé, un xogador cun rendemento cuestionado que rescindiu o seu contrato para fichar polo Ibiza. E onte, sorprendentemente, saíu o propio capitán, Álex López, para deixar oco no cadro, mais seguirá na estrutura do club. Para cubrir estas saídas, os verdibrancos ficharon Raúl Blanco, mediapunta cedido polo Casa Pía. Blancoachegará versatilidade e xogo ofensivo ao equipo. Outra incorporación foi a de Naim García, extremo zurdo cedido polo Leganés do cal se espera que achegue dinamismo e goles ao ataque do Racing. Chegaron tamén ás filas dos Diaños Verdes Héber Pena, logo dunha temporada no Vizela luso, e o lateral esquerdo arxentino, Emanuel Ínsua. O baleiro que deixa Lucas No Dépor, o mercado de inverno tamén deixou cambios. O club viu como o seu capitán e buque insignia, Lucas Pérez, rescindía o contrato por motivos persoais, deixando un baleiro no vestiario. O xogador estaba relacionado cunha posíbel fichaxe polo Raio Vallecano, pero ao feche desta edición seguía sen equipo, deixando o equipo sen unha das súas figuras máis representativas. O Dépor tamén perdeu o gardameta Eric Puerto, que marchou cedido ao Marbella da Primeira Federación até o final da tempada. O dépor tamén perdeu Davo, que marcha cedido ao Real Murcia, obrigando o equipo a reforzarse. O club fichou tres xogadores para mellorar o seu rendemento. O primeiro foi Diego Gómez, un extremo dereito de 20 anos que retorna ao club tras un breve paso como cedido polo Arenteiro, onde anotou 2 goles e deu 3 asistencias en 20 partidos. Gómez, que estaba a destacar no equipo carballiñés, chega ao Dépor cunha boa bagaxe na Primeira Federación e aportará dinamismo ao ataque. O equipo tamén fichou o dianteiro neerlandés Zakaria Eddahchouri, que chega do Telstar, onde anotou 17 goles e deu 2 asistencias en 23 partidos na Segunda División do seu país. Eddahchouri, cunha gran capacidade goleadora e físico impoñente, debutou co Dépor nos últimos 20 minutos do partido ante o Eibar deixando boas impresións. Outra incorporación foi a do mediocentro australiano Denis Genreau, procedente do Toulouse. Genreau, cunha gran visión de xogo e versatilidade. Chega para reforzar o mediocampo do equipo, ao que achegará creatividade e capacidade de asociación. E onte completaba o equipo como cedido o lateral zurdo serbio Nemanja Tosic, que vén suplir a baixa de Escudero. Movementos na Liga F Finalmente, o fútbol feminino tamén houbo varios movementos neste mercado de inverno. A internacional venezolana Oriana Altuve marchou do Dépor tras non ter oportunidades nin con Irene Ferreras nin co seu sucesor, Fran Alonso. Altuve recibiu unha importante oferta económica do Fomget, equipo da Superliga turca, e decidiu continuar a súa carreira alí. A centrocampista Carlota Sánchez tamén deixou o club, pero en calidade de cedida ao Real Oviedo, da Segunda Federación, para contar con máis minutos de xogo. Para reforzarse, o Dépor fichou á dianteira nixeriana Blessing Nkor, internacional coa súa selección e con experiencia no campionato turco. Mais a xogadora, que prometía ser unha gran achega para o equipo, sufriu unha fractura na tibia dereita no seu primeiro partido co Dépor ante o Betis, o que a manterá afastada dos campos por un longo período de tempo. E a última hora incorporaba a tamén dianteira Elyse Bennett, estadounidense que procede do San Diego Wave.