O fútbol galego avanza con forza na Copa do Rei

Unha intensísima xornada copeira, na que entraron en xogo até sete formacións da Galiza, deixou resultados dispares, pois -con independencia do feito polo Rácing de Ferrol no seu choque ante o Marbella, que finalizou fóra do horario de fechamento desta edición-, avanzaron á segunda fase Celta, Lugo e Arenteiro, mentres que ficaron eliminados Compos e Boiro.  

Turégano-Celta

O conxunto celeste foi o primeiro en fechar o seu pase, após superar sen ningún tipo de complicación o Turégano de Preferente por 0 goles a 4, tantos de Bamba ('11, '32) e Carles Pérez ('60, '71).

Ambos os realizadores foron os activos máis destacados nun equipo que, a pesar do resultado, transmitiu certa sensación de desgana, e de que xogadores menos habituais nos esquemas de Rafa Benítez, como Williot Swedberg, Cervi ou Douvikas, desaproveitaron unha oportunidade de ouro para reivindicarse.

Compostela-Tenerife

A piques estivo de dar a sorpresa a Sociedade Deportiva Compostela ante todo un Segunda como é o Tenerife. Os chicharreros impuxéronse pola mínima (0-1, Ángel, '10) no Vero Boquete nun encontro no que a SD deu a cara en todo o momento e tivo numerosas ocasións para conseguir o empate, pero non logrou perforar as redes dunha escuadra insular que acabou perdendo tempo e pedindo a hora.

Atlético Antoniano-Lugo

O Club Deportivo Lugo chegaba como favorito ao duelo co modesto bloque sevillano, pero  a pesar da superioridade que demostrou en practicamente todo momento no Municipal de Lebrija o resultado gafas, 0-0, luciu no electrónico até o minuto 79, cando Leandro Antonetti bateu de remate coa testa un Tabuaço que parecía imbatíbel.

Este triunfo sobre o Antoniano é o quinto consecutivo dos da Cidade da Muralla, un rexistro que non lograban desde hai case 13 anos, cando venceu en seis partidos seguidos entre 2010 e 2011.

Avilés Industrial-Arenteiro

Sufrimos como nunca, pero gañamos como sempre. O Arenteiro prolonga o seu idilio co torneo do KO, que disputou por terceiro ano consecutivo e onde unha vez máis logrou superar o primeiro escollo. 

O Avilés Industrial uniuse a Logroñés e Almería na listaxe de vítimas dos do Carballiño, que saíron con vida do Román Suárez Puerta, non sen moito sufrimento, grazas a un tanto de Markitos no '32, cando peor o estaba pasando un Arenteiro que tivo a opción de aforrarse todo o sufrimento que pasou defendendo a súa exigua vantaxe na segunda metade se Davo non parase un penalti lanzado por Juan Delgado. 

Covadonga-Dépor

A Copa adoita ser sinónimo de tensión... nas súas roldas superiores. Ninguén agardaba que o Deportivo sufrise tanto para superar un Covadonga ao que derrotou na prórroga (3-1) após empatar no minuto 90 do tempo regulamentario.

Boiro-Mallorca

A pesar dunha derrota por 0-4, o Boiro viviu onte un dos días máis especiais da súa historia ao enfrontarse a un Mallorca que mostrou a súa superioridade en todo momento.

O Arousa regresa ao torneo do KO 30 anos despois

Día para o recordo en Vilagarcía, pois o Arousa regresa hoxe á Copa do Rei despois de 30 anos de ausencia. O seu rival será todo un Primeira División, o Granada, que saltará a un céspede da Lomba moi castigado polas inclemencias do tempo nas últimas datas ás 19 horas.

Co favoritismo, sobre o papel, recaendo de forma absoluta no combinado andaluza, o técnico galego, o sempre guerrilleiro Luisito, non tira a toalla antes de comezar o combate e cuantifica as súas opcións en 55-45 ou 60-40%". "Seremos ambiciosos desde o minuto un", confirmou o ex de Rácing de Ferrol, Ourense, Fabril ou Pontevedra.