A competición de hóckey feminino comeza con abundancia de equipos galegos

O hóckey sobre patíns feminino é un deporte moi rico no ámbito galego, son sete os equipos que compiten nas máximas categorías. En primeira división, coñecida como OK Liga, figura o Hóckey Club A Coruña, equipo clásico que nace tras a desaparición do equipo feminino do Liceo. En segunda división, a OK Prata, o abano amplíase considerabelmente: temos en Santiago de Compostela o Hóckey Club Raxoi e o Berenguela Axiltec, no Condado o Hóckey Club Ponteareas; en Cambre (comarca da Coruña) ao Resa Cambre, en Vigo a Traviesas e na Coruña o Marineda Hóckey, equipo que nace este ano tras unha división no HC A Coruña. HC A Coruña, equipo principal As coruñesas comezan esta tempada cun equipo practicamente novo, pois a excepción de Anna Bulló, que xa estaba a tempada pasada, incorporáronse un total de nove xogadoras ao equipo. Ás filas das dirixidas por Stanis García uniuse Raquel Parga e Celia Pinacho desde o Resa Cambre, Icía Brea e Lucía Velo que veñen do Raxoi, Daniela Fernández do Oleiros, Rebeca González do Esneca Fraga, Uxue Otegui de Bembibre, Berta Ribas de Vilanova e Jana Crespo de Sant Jordi Desvalls. O equipo da categoría de ouro quedou noveno de catorce equipos na tempada pasada e este sábado debutan ás 17 horas ante o Esneca Fraga, segundas clasificadas do curso pasado. Anna Bulló sinala a Nós Diario de cara ao encontro: "Temos que afrontalo como calquera partido porque dá igual a quen teñas de rival, temos que saír a por todas e a dálo todo". Bulló analiza tamén os obxectivos desta tempada que para ela pasan por conseguir estar o máis arriba posíbel na táboa e obter a clasificación á copa da raíña. A xogadora analiza tamén o papel do seu equipo no panorama galego: “Temos que traballar para que a xente teña o Hóckey A Coruña como referencia, sobre todo para que as nenas pequenas pensen en xogar neste equipo cando sexan maiores”. Para Anna Bulló nisto do deporte non hai soños: “A verdade é que nunca tiven ningún soño. Agora mesmo gozar, gozar xogando”, dicía. A revolución da Coruña Se algo sorprendeu dentro do mundo do Hóckey a patíns foi a creación do Marineda Hóckey, o club coruñés nace como unha escisión do HC Coruña e na formación do proxecto participaron as ex xogadoras do conxunto de primeira división Mar Franci, Alejandra Martín, Efe Muñoz e Alba Garrote. O equipo debutará mañá ás 12 horas, como local e nun derbi ante as compostelás do Berenguela. Alejandra Martín, en declaracións a Nós Diario, sinala que “todas estamos con moita ilusión de comezar por fin a liga, imos ir a polos tres puntos e máis na casa”. Ademais, a xogadora salienta o emocionante que é a presenza de tantos equipos galegos en OK Prata. No Marineda teñen moi claro cal é o obxectivo: “Ascender e gañar, se podemos, todos os puntos de liga”, sinala Alejandra Martín. O club aspira, de acordo co afirmado pola xogadora, a poder ter un equipo feminino na elite do hóckey sobre patíns nunhas condicións o máis ideais posíbeis sendo referencia no deporte feminino. As xogadoras do HC Marineda. (Foto: Nós Diario) Alejandra Martín sostén, a respecto do temor de non cumprir coas expectativas, que “o medo sempre está aí, pero penso que estamos traballando moi ben e temos un equipo sólido cun obxectivo claro, así que temos toda a confianza do mundo en que saia ben”. A xogadora analiza tamén os demais equipos galegos: “Penso que son equipos completos con xogadoras con moita proxección e outras con moita experiencia, como no caso do Raxoi”. O Raxoi de Compostela O equipo da capital da Galiza xogará este ano na segunda división tras o seu descenso de OK Liga a tempada pasada. As santiaguesas debutarán como locais ante as alacantinas do Club Promoción Patín Raspeig este sábado ás 20.15. O presidente do Raxoi, Miguel Rodríguez, en conversa con este xornal, analizaba así o equipo do País Valencià: “É un equipo que leva moitos anos en OK Prata e que segue traballando para ter un proxecto de vangarda na zona do mediterráneo fóra de Catalunya”. As xogadoras do HC Raxoi. (Foto: Nós Diario) Miguel analiza tamén equipos da contorna como o Marineda, ao que describe como "un equipo configurado para ascender”. Refírese tamén ao bo nivel de equipos madrileños como Alcalá, que o ano pasado xogou en OK Liga e equipos como o asturiano Patinalon, que quedou ás portas do ascenso a tempada pasada. O presidente ten claro o obxectivo: “A curto e medio prazo é volver estar en OK Liga, iso como mínimo”, ao tempo que sinala a necesidade de ser coherentes e non obsesionarse por volver chegar á categoría, sobre todo polo impacto económico e o volume de organización que supón. Sinala que para a xunta directiva supuxo un esgotamento moi elevado por todo o que significa estar no máximo nivel, mais que se poden volver este ano, non agardarían ao seguinte. As dificultades para competir na elite do deporte Nas conversas coas persoas vinculadas ao hóckey feminino tratamos a problemática que supón practicalo profesionalmente, dado que as dificultades son infinitas e moitas veces o abandono do deporte chega a ser unha imposición. O presidente do Raxoi indica como moitas veces compatibilizar o traballo coa competición era algo imposíbel, no seu equipo, por exemplo, dúas xogadoras tiveron que deixar de xogar aos vinte e cinco anos debido ao seu traballo de enfermeiras. Miguel sinala tamén como se dá unha situación moi particular que é que as rapazas poden levar xogando desde incluso antes dos 16 anos nun nivel demasiado alto, algo que debería tratar de evitarse para que ese salto chegue máis tarde. Para Miguel Rodríguez o problema radica en que a base feminina non é o suficientemente ampla como para cubrir todas as categorías. Esta dificultade á hora de compatibilizar a práctica profesional está latente en moitos equipos, por exemplo Anna Bulló explica como ela compatibiliza os seus estudos superiores con dar clases de patinaxe e hóckey e como é moi difícil atopar un traballo que se che adapte ao horario. “Se queres dedicarte profesionalmente ao hóckey é complexo poder render ben tendo un traballo convencional”, apunta Anna Bulló a este xornal.