O Celta quere dar saída a seis xogadores no mes de xaneiro

Os xogadores e o corpo técnico do Celta xa están a desfrutar duns merecidos días de vacacións despois dunha primeira parte da tempada frenética, na que disputaron 26 partidos en apenas catro meses. Os xogadores volverán aos adestramentos a próxima segunda feira, pero iso non significa que todo o club estea de vacacións no Nadal. Ao contrario. A secretaría técnica comeza agora unhas semanas frenéticas de traballo nas que terá que configurar o cadro de xogadores definitivo que rematará a tempada. Na folla de ruta non aparecen moitos fichaxes, xa que o obxectivo ambicioso que teñen Marco Garcés e o seu grupo de traballo é o de conseguir até seis baixas.

Desde que rematou o mes de agosto, Claudio Giráldez traballou con 28 homes e mais todos aqueles que foi subindo desde o filial para ilos vendo en acción. O número é moi elevado, e tanto o corpo técnico como o propio club queren reducilo aproveitando a fiestra que se abre en xaneiro. Ademais, o próximo día 2 está citado Tadeo Allende para adestrar xunto ao resto. Con el serán case 30 futbolistas, un número totalmente desproporcionado para dúas competicións.

Marco Garcés leva semanas falando con Giráldez e co resto do corpo técnico para coñecer de primeira man os nomes dos que estarían dispostos a prescindir, co risco de que quizais non cheguen máis fichaxes. Ese punto non preocupa ao adestrador do Porriño, que prefire que marchen algúns xogadores cos que non conta para mellorar a calidade dos adestramentos e, chegado o momento, dar oportunidades a algún canteirán do Fortuna. E na lista que xa ten no club aparecen media ducia de futbolistas aos que en A Sede queren dar saída.

O primeiro e máis evidente é Joseph Aidoo. O central africano está a seis meses de rematar o seu contrato co Celta e o club non ten intención de renovalo. No verán, a entidade que preside Marián Mouriño ofreceulle unha rescisión incentivada que lle cubrise parte dos 1,8 millóns de euros que ten de salario cada ano. O africano non a aceptou xa que prefería probarse en Vigo, mais agora podería aceptar marchar de balde e asinar con outro equipo a custo cero.

O segundo, nunha situación similar, é Franco Cervi, ao que o Celta leva meses pondo no mercado. O arxentino deixou claro por activa e por pasiva que non vai cambiar de aires e dixo en A Sede que, se queren que se vaia, terán que pagarlle o que lle resta de contrato, cuxo salario supera os 1,5 millóns anuais. Nesta situación, é case imposíbel que Garcés o convenza, aínda que non deixarán de intentalo durante todo o mes de xaneiro.

Facer oco

Esas dúas baixas estarían estreitamente relacionadas co obxectivo de aforrar diñeiro de cara ás contas económicas da presente tempada, na que o Celta ten que xerar case 30 millóns de euros en ingresos. Non obstante, hai máis nomes que non terían tanto a ver co que o club aforraría dos seus salarios, senón con facer espazo a posíbeis fichaxes que poidan chegar durante o mes de xaneiro. Giráldez segue pedindo un xogador que una o centro do campo coa dianteira, e Marco Garcés ten apuntado en vermello o regreso de Fer López.

Como non hai fichas libres, o club ten que xerar espazo na plantilla, e un nome que aparece para iso é Marc Vidal. O catalán é o terceiro porteiro do equipo, o único xogador que aínda non disputou nin un minuto esta tempada e que, salvo milagre, non o fará nos próximos meses. O Celta está disposto a darlle a carta de liberdade, algo que tamén intentou no verán, pero o porteiro parece non estar disposto. O pasado mes de agosto estivo a piques de asinar polo Burgos e el mesmo rompeu a operación cando estaba case fechada. En Vigo non o queren, ao entender que entre o primeiro equipo e o filial teñen ben cuberta esa posición, e póñenlle todas as facilidades para que marche.

O cuarto nome é Damián, pero, ao contrario que nos casos anteriores, o Celta non quere perdelo e só aceptaría unha cesión a algún equipo da zona baixa de Primeira, a parte alta de Segunda ou o estranxeiro, e sempre coa intención de que o mediocentro galego acumule o máximo de minutos posíbel até o 30 de xuño. Agora mesmo, Damián é o quinto mediocentro para Claudio Giráldez e o propio técnico xa lle fixo ver que o mellor para ambas as partes sería unha saída. Está por ver se o xogador acepta a postura do club e busca relanzar a súa carreira ou se, pola contra, prefire quedar en Vigo e loitar por un posto.

Vendas

Por último, hai dous xogadores chamados a deixar algo de diñeiro na conta bancaria da entidade. Tadeo Allende é o que ten unha valoración de mercado máis alta e o club quere conseguir uns 10 millóns de euros. Varios equipos da MLS, Arxentina e México interesáronse por el, e o club pensa que será unha boa venda. Tamén Luca de la Torre, cuxo futuro está nos Estados Unidos, aínda que por un prezo moito máis baixo.

Se o Celta consegue a difícil misión de lograr todas estas baixas, quedará con 23 xogadores, unha masa salarial moito máis beneficiosa e, o máis importante, espazo no plantel para que chegue Fer López.

Os vigueses, cun ollo posto nos  xogadores cedidos

O Celta fixo os deberes no mercado de fichaxes do pasado verán no capítulo de saídas. Algunhas das incorporacións que chegaron de man do anterior director deportivo, Luis Campos, xa non contan para Claudio Giráldez. O problema que teñen varios deles está no seu elevado soldo, ao alcance de moi poucos equipos en Europa. É por iso que o club vigués tivo que pagar parte do seu salario para que xoguen esta tempada noutro conxunto e poidan revalorizarse para unha posíbel venda en 2027.

No club non quitan ollo aos seus catro futbolistas cedidos noutros equipos. Os dous que máis están a aproveitar a súa saída son Manu Sánchez e Unai Núñez. Ambos son titulares en Levante e Verona, respectivamente, aínda que os seus clubs non van ben na clasificación e en caso de descenso é seguro que non paguen as súas opcións de compra -duns cinco millóns de euros en cada caso-. Ademais, os dous teñen contratos longos en Vigo.

Os outros dous son Carles Pérez e Dotor. O Celta aspira a que o primeiro quede en Grecia a próxima tempada e podería darlle a carta de liberdade se o Aris quere contar con el. Dotor, pola súa parte, ten un salario menor e a súa rescisión pode ser unha opción en xullo.