O Celta afasta os equipos interesados en Ilaix, Carreira e Swedberg

O Celta afronta nestas semanas unha parte moi importante do seu calendario. Na Liga quere asentarse entre os seis primeiros clasificados e presionar a Betis e Espanyol para volver xogar en Europa a próxima campaña. E precisamente na Europa League disputará os seus dous últimos partidos da primeira fase co obxectivo de clasificarse para a seguinte rolda. Todo isto co mercado de fichaxes aberto. Polo de agora, xa certificou a venda de Luca de la Torre e a cesión de Damián, mentres que está a piques de fechar o traspaso de Tadeo Allende. Non serán as últimas operacións, pois nos últimos días recibiu varias propostas por algúns dos seus futbolistas, aínda que na rúa do Príncipe teñen claro que non queren desprenderse dos máis importantes.

Os vigueses convertéronse nun equipo vendedor nos últimos anos, máis por necesidade que por desexo. Gabri Veiga, Strand Larsen, Brais Méndez ou Fer López son algúns dos futbolistas que deixaron o Celta recentemente. O próximo verán tamén deberán saír máis xogadores, e é que o club orzou máis de 30 millóns de euros en ingresos extraordinarios, que na súa maioría chegarán pola venda de xogadores. Pero iso ocorrerá no verán. A directiva ten claro que non quere debilitar o equipo na segunda metade do presente curso e por iso afastou varios clubs que se interesaron por xogadores importantes para Claudio Giráldez.

Swedberg renovou até 2029 e elevou a súa cláusula de rescisión até os 50 millóns de euros

Un por quen preguntaron estas semanas —e que xa recibiu propostas o pasado verán a pesar de ser un fichaxe dos vigueses— é Ilaix Moriba. O centrocampista guineano está a ser indiscutíbel para Giráldez, quen foi cambiando os seus compañeiros no dobre pivote ao longo da tempada. Moriba está a mellorar o seu nivel respecto ao ano pasado e iso fai que equipos da Premier League, da Bundesliga e da Serie A poñan os seus ollos nel. A súa cláusula é de 30 millóns de euros, unha cantidade pactada entre ambas as partes despois de que o ex do Barcelona tivese que baixar moito o seu soldo. De momento non chegou ningunha oferta por escrito, pero o Celta non as estudará en xaneiro. Se algún club quere o guineano terá que pagar esa cantidade ou outra moi próxima se o futbolista pedise saír, algo que ninguén espera.

Tamén Williot Swedberg ten pretendentes que están a seguir a súa evolución esta tempada. O seu nome deu a volta ao mundo hai un mes cando marcou dous goles no Santiago Bernabéu na vitoria dos vigueses ante o Real Madrid. O pasado verán, o Celta renovouno até 2029 e subiu a súa cláusula de rescisión até os 50 millóns de euros, unha cantidade que saben que ninguén pagará hoxe en día. No pasado, PSV e Ajax presentaron ofertas por el, pero o seu futuro, en caso de saír de Vigo, está máis perto de Alemaña, onde equipos como o Stuttgart ou Wolfsburg non lle quitan o ollo de enriba. Iso si, tamén terá que ser no verán, porque o Celta non quere nin pensar nun traspaso este mes.

E o terceiro xogador polo que chamaron á Sede é Sergio Carreira. Esta tempada está a ser a da súa confirmación e é un dos futbolistas máis utilizados por Claudio Giráldez. Pode xogar por ambas as bandas e, defensivamente, cada día é máis completo. Os grandes de Portugal seguen os seus pasos, pero tamén algún equipo da Serie A viaxou a Vigo para velo en directo. O canteirán tamén renovou o pasado verán e ten asinado un contrato longo. Con Mingueza máis fóra que dentro de cara á próxima tempada, o Celta quere que Carreira siga moitos anos, aínda que sabe que antes ou despois chegarán as ofertas por el.

Saídas en xaneiro

Que o Celta queira facerse forte neste mercado de fichaxes cos seus xogadores máis importantes non quere dicir que non vaia haber máis saídas este mes de xaneiro. O club está a negociar a rescisión de contrato con Marc Vidal, que ten unha oferta do Oviedo. No verán intentou a súa saída sen sorte para poder ter unha ficha libre e agora esa urxencia xa desapareceu, pero en Vigo queren aforrar parte do seu salario para seguir fortalecendo a súa economía.

Equipos da Serie A, da Bundesliga e da Premier seguen os pasos de Ilaix

Ao mesmo tempo, na Sede seguen insistindo en que necesitan reducir a súa defensa, onde teñen oito xogadores para tres postos. Neste punto, a súa intención é que saia un entre Joseph Aidoo ou Yoel Lago, os dous recambios máis naturais que ten Starfelt. O ghanés remata contrato en xuño e sairía mediante unha rescisión, mentres que co canteirán de Mondariz a única opción sobre a mesa é a dunha cesión. No Celta, iso si, perderon a esperanza de que Franco Cervi cambie de equipo en xaneiro e saben que rematará o curso en Vigo, igual que Ristic.

Fer López

No capítulo de chegadas, de momento, o único nome no que traballa o club vigués é o de Fer López. O pasado sábado apenas disputou un cuarto de hora co Wolverhampton na FA Cup –na vitoria por 6 a 1 ante o Shrewsbury Town da cuarta división–, e no Celta entenden que estes días se intensificarán as negociacións cos ingleses para a súa posíbel volta apenas seis meses despois de ser vendido. Faríao como cedido e, presumibelmente, polo de agora, até final de tempada, aínda que o xogador e o propio Celta preferirían que fose por 18 meses. Se non chega o canteirán, na Sede non descartan que non fichen ninguén.

Os vigueses firman unha primeira volta notábel

O Celta venceu esta pasada segunda feira ao Sevilla (0-1) no último partido da primeira volta. O equipo vigués gañou grazas a un gol de penalti de Marcos Alonso no tramo final, o que lle permite sumar 29 puntos e manterse na sétima posición da clasificación, empatado co Betis e cada vez máis perto do Espanyol, sexto e quinto, respectivamente. Desde o último ascenso, só na tempada 2015-16 o conxunto celeste conseguiu máis puntos (31) que nesta ocasión após 19 xornadas.

Particularmente positivos están a ser os números fóra da casa, onde o Celta gañou cinco dos seus últimos seis partidos de Liga. Os de Claudio Giráldez sumaron os tres puntos ante Osasuna, Levante, Alavés, Real Madrid e Sevilla, asinando un empate fronte ao Oviedo. Neste momento, son o terceiro mellor visitante da Liga, só por detrás do FC Barcelona e do Real Madrid.

Parte deste éxito está no aspecto defensivo. O equipo vigués apenas recibiu dous goles nos seus últimos sete partidos de Liga e xa son catro encontros seguidos lonxe de Balaídos coa portaría a cero. Radu é actualmente o segundo clasificado no Trofeo Zamora, que recoñece o porteiro menos goleado do campionato e que lidera Courtois. O romanés ten o mellor rexistro dun porteiro do equipo celeste nos últimos 14 anos.