A billarda procura o seu recoñecemento como modalidade deportiva. Algo do que carece hoxe en día e que dificulta o fomento e pervivencia do que naceu como un xogo tradicional que se practicaba por toda Galiza. Representantes das tres confederacións que integran a Liga Nacional da Billarda (LNB) desprazáronse até Compostela para trasladar aos grupos parlamentarios esa demanda: que se lles considere deporte. Unha petición da que tomaron nota En Marea, PSdeG e BNG; o PP escusou a súa presenza mais fixa aberto a unha nova xutanza.
“O recoñecemento como deporte é moi importante”, explica Xan Rodiño, da LNB, porque garantiría “a pervivencia” desta práctica a permitiría a súa extensión. “Se a Liga Nacional da Billarda desaparece, desaparecería a billarda”, asegura, para ilustrar o esforzo e vontade que mantén vivo este xogo popular.
Na actualidade son asociacións e colectivos os que dan vida á billarda ou estornela. Non é deporte así que non poden acceder a apoios e axudas para material, desprazamentos, ter instalacións propias e acaídas. De ser recoñecidos como modalidade deportiva poderían acceder a esas facilidades e tamén poder introducirse en colexios, garantindo así un coñecemento deste deporte que crease canteira. “Actualmente a idade en moitos participantes é moi alta e non hai relevo”, lamentan desde a Liga. “Entre 14 e 30 anos case que non hai practicantes”.
Actualmente hai 19 equipos e case 400 persoas participando na LNB, unha competición que chegou a sumar 40 equipas. Desde o 2005, ano no que botou a andar, máis de 5.000 persoas xogaron á billarda, calculan.
“Co recoñecemento como modalidade deportiva protexeríase e fomentaríase”, consideran. Apontan como en territorios como Catalunya o Canarias están avanzando en fórmulas para preservar e fimentar a práctica desta modalidade. Rodiño pon como exemplo Eslovenia: “Alí chámase pandolo e é oficial, alí destacan moito a importancia de que se considerase un deporte para garantir a súa pervivencia”.
Trátase, resumen, de dotar a billarda dunha base que permita que se practique con regularidade, “tamén que se modernice”. Desde a LNB destacan que a billarda “engancha, a xente que xoga a ela gústalle moito e os que proban, repiten”. Por iso queren mil primaveras máis para a billarda.
