A aventura que agarda en Asia e Oceanía o equipo de Édgar Vigo e Fátima Ameneiro: "É unha tolemia, mais afrontámolo con moita ilusión"

O automobilismo galego que corre en rallys aspira a ser cada vez máis internacional. O equipo de competición formado por Édgar Vigo e Fátima Ameneiro, após os éxitos conseguidos en Europa, anunciou que participarán este ano no FIA Asia-Pacific Rally Championship (APRC), unha das competicións de rally máis duras e exixentes do mundo. Este potente campionato, que a nivel estatal só conseguiu gañar Carlos Sainz en 1990, comezará no mes de abril nas emblemáticas pistas de Nova Zelandia do 10 ao 12 de abril, para despois continuar no exixente trazado da India unha semana despois, os días 18 e 19 de abril. Xa chegado o verán, do 7 ao 9 de agosto, o equipo viaxará até Indonesia para afrontar, ademais das circunstancias propias da competición, os condicionantes climáticos dese país asiático. O campionato acabará fechando a tempada do 30 de outubro ao 1 de novembro polas eternas estradas da China. O Volkswagen Polo 1.0 TSI de 210 cabalos que terán na India. (Foto: Club Escudaría Scratch Fene) Un reto loxístico “É unha tolemia, mais afrontámolo con moita ilusión”, recoñece a Nós Diario Fátima Maneiro. Após unha excelente traxectoria en Europa, onde conseguiron recentemente o Campionato de copilotos e ser subcampións de pilotos (FIA ERT 2024), ademais de ostentar títulos no Circuíto European Rally (2020 e 2021), decidiron dar o salto a outros continentes. A idea xurdiu o ano pasado en Turquía. “Ampliaran o Europeo e fomos cun coche de aluguer cun equipo romanés e animounos a experiencia como para ir a Asia e Oceanía”, relata. Entre as dificultades deste novo reto está, sobre todo, o tema loxístico. "As dúas primeiras probas son seguidas polo que tivemos que xestionar dous coches distintos", indica Ameneiro. Vigo, pola súa parte, admite que, cos anos, chegaron á conclusión de que, "como non somos mecánicos con taller propio, sae máis económico alugar un vehículo que teoricamente xa vén coas garantías do preparador e por agora as experiencias que tivemos foron boas". Sen coñecer "ninguén" neses países partiron dos contactos que lles facilitaron desde a Federación Internacional de Automobilismo (FIA). Así, conseguiron contar cun Suzuki para o primeiro rally e cun Volkswagen Polo para o segundo. "É sorprendente, mais este último é o coche de todos os rallys da India", asegura Vigo. Para os seguintes aínda están en conversas con varias escudarías. Desafío deportivo Vigo e Ameneiro teñen claro que o desafío deportivo será maiúsculo. "Cada proba será nun país e cun coche distinto", asegura o piloto. Contan coa experiencia previa de dez anos con coches de aluguer que tiveron en competicións anteriores polo que non é un tema que os preocupe. En relación aos rivais, Vigo admite que é "complicado" estudalos. "Nos últimos anos experimentaron coa proposta de facer as diferentes probas, mais a definitiva era a última do mundial de rallys, no Xapón", relata o piloto de Fene. A idea non funcionou e este ano coincide que voltan ao formato "tradicional" e gañará quen máis puntos teña sumando as diferentes probas. O Suzuki Swift Sport APRC 4 co que correrán en Nova Zelandia. (Foto: Club Escudaría Scratch Fene) "Haberá que agardar polo menos ao segundo rally, na India, para ver a listaxe de inscricións", indica Vigo. "Veremos, daquela, que equipos repiten dos que correron en Nova Zelandia", agrega. Nestas dúas primeiras probas estarán as equipas que poden optar ao título, aínda que, pola pouca distancia temporal entre ambas as dúas, moitas quedarán sen opcións. Aínda que non probaron os coches, si teñen información de como son mesmo a través de vídeos que lles fixeron chegar desde Nova Zelandia e a India. Igual acontece cos percorridos e os tramos de competición. "Son pistas moi rápidas e algunhas tamén extensas, como o que correremos na primeira proba, que ten 48 quilómetros e con moitas rectas, un escenario moi diferente ao que atopamos normalmente aquí", destaca Ameneiro. Climas e paisaxes "Partiremos de Nova Zelandia, cun clima moi frío e húmido para, días despois, ter que afrontar a calor extrema da India", explica Ameneiro. A meteoroloxía vai ser un dos puntos determinantes no éxito da equipa galega e por iso aseguran que van "preparados e co material necesario para afrontar calquera circunstancia negativa". Tamén a paisaxe contará no desenvolvemento das diferentes probas. "As distancias e os percorridos son moi diferentes aos que temos, por exemplo, aquí", aclara Ameneiro. Neste caso pon como exemplo competicións "con trazados con moitas curvas e poucas rectas, algo que alí será exactamente ao revés", conclúe. Iso si, antes de viaxar xa teñen a cálida resposta na distancia desde eses lugares. "Non deixan de escribirnos e recibimos moito cariño por parte da organización que teñen en conta o esforzo que facemos en participar desde tan lonxe", afirma a copiloto. O desafío de ter que conducir cun volante á dereita A nova aventura de Édgar Vigo e Fátima Ameneiro terá un compoñente engadido que resolver que nunca ates tiveron nunha competición: a condución é pola esquerda e os coches de competición que teñen o volante á dereita. "Será todo un reto para nós", admite o piloto de Fene. Estes días na Galiza, antes de partir cara a Oceanía, aproveitan que teñen un compañeiro na súa escudaría que está a preparar un Mazda MX-5 mercado no Reino Unido para probar a condución pola esquerda e posición que terá no vehículo que será diferente á habitual. "O principal que temos que mirar esas curvas de esquerda que cando sentas dese lado saber perfectamente onde entra a roda do coche, agora teremos que adaptarnos", asegura a Nós Diario. As "notas" da copiloto "Xa estivemos en países onde se conduce por ese lado mais nunha en carreiras oficiais, esta será a primeira vez que o aplicaremos nunha competición", indica Fátima Ameneiro. No seu caso, como copiloto, a dificultade comeza á hora mesmo de coller notas para cada tramo do rally. "Estamos expectantes por ver como se desenvolverá este tema mais tamén con moita ilusión por correr xa", recoñece a Nós Diario.