A Xunta pecha o acordo para expor en Galiza 'A derradeira lección do mestre'
Un acto en que interviron as cabezas visíbeis da cultura institucional galega serviulle á Xunta para pechar, na mañá desta sexta feira, o acordo co Centro Galicia de Bos Aires grazas ao que se exporá, por primeira vez en Galiza, A derradeira lección do mestre de Castelao.
A sinatura do convenio realizouse na Cidade da Cultura, en Santiago de Compostela, que tamén acollerá a mostra do cadro no último trimestre do ano en curso. De “galeguismo integrador” cualificou o conselleiro de Cultura, Román Rodríguez, o proxecto expositivo -comisariado por Miguel Anxo Seixas, biógrafo do rianxeiro- en que se poderá ver unha obra que Castelo pintou no exilio arxentino en 1945. E que representa a violencia fascista, especialmente cruel cos docentes republicanos.
Para o presidente do Centro Galicia, José María Vila Alén, que o lenzo se amose no país natal do seu autor resulta “oportuno como demostración da achega” da diáspora. Certo debate sobre a pertinencia de que A derradeira lección do mestre quede en Galiza ou regrese ao lugar onde foi pintada por Castelao atravesou os medios culturais galegos nas últimas semanas.
O acordo asinado entre a Xunta e a institución da diáspora supón a cesión durante catro meses. O conselleiro explicou que o Goberno galego “non pedirá” o depósito da obra, engadiu que “o Centro Galicia é Galiza aínda que estea a dez mil quilómetros”.
No acto desta mañá tamén falaron os presidentes da Real Academia Galega, Víctor Freixanes, e do Consello da Cultura Galega, Ramón Villares.