Xaquín Marín, un imprescindíbel do humor gráfico, protagoniza o 'Sermos Galiza'

Como cada sábado, Nós Diario trae entre as súas páxinas un novo número do semanario Sermos Galiza, á venda durante a fin de semana. Desta vez o protagonista é Xaquín Marín (Ferrol, 1943), un dos humoristas gráficos imprescindíbeis do país. O público sábeo e, aínda que non foi o primeiro recoñecemento que recibía, o pasado día 7, coincidindo no tempo co seu oitenta aniversario e coas seis décadas de carreira artística, foi protagonista da gala coa que a Federación Galiza Cultura homenaxeou "o humorista gráfico galego máis relevante despois de Castelao".

"Nunca agardei chegar a este momento. O que si agardaba eran outras cousas, outras glorias. Eu pensaba que era un gran pintor e que ía ser un privilexiado no mundo da arte. Eu era un obreiro do naval que tiña ínfulas de artista, así que quería ser pintor a toda custa. Tiña moita vocación e aproveitaba calquera descoido dos xefes, do operario cando eu era aprendiz, para pórme a debuxar. Pretendía ser pintor", comenta, nesta extensa entrevista do Sermos que asina Xosé Gómez.

Tempo de cogomelos

A primeira reportaxe deste número do semanario corre a conta de Alejandro Mínguez, que nos ofrece unha escolma de cogomelos que pasaron de ser comestíbeis a tóxicos. A humidade e a temperatura suave de outono e primavera propician a aparición de especies en distintos hábitats, malia que cogomelos, haber, hainos todo o ano, comestibles e tóxicos. Cada vez hai máis afeccionados, máis actividades formativas, saídas... Pero tamén todos os anos hai ingresos hospitalarios por intoxicacións causados por falta de formación e ausencia de precaución. A divulgación micolóxica galega, iniciada en 1961, aínda ten moitos capítulos por escribir, malia o avance nesta materia, e restan accións en formación regrada e micoturismo.

"A actual tempada silvestre de cogomelos na Galiza chegou con certo adianto en relación aos últimos anos. As chuvias de inicios de setembro deron como resultado a aparición de especies en distintos hábitats de interese culinario e tamén tóxicas. Excelentes Boletus edulis e Macrolepiotas proceras comparten espazo coas mortais Amanitas phalloides. A única regra no mundo dos fungos é que non hai regras. Hai que ter unha formación mínima para saír ao campo e moita precaución", advirte Mínguez.

Batalha: a casa de todos os cinemas

A apertura en decembro de 2022 do Batalha Centro de Cinema devolveulle á Baixa do Porto un edificio de intensa historia para usos culturais. Un espazo dedicado ao coñecemento e a arte que nace a partir do cinema e celebra con entusiasmo a complexidade e a diversidade da creación do pasado e do presente. Unha casa para pensar o mundo a través dos filmes en diálogo aberto con toda a cidadanía. Martin Pawley achéganos a Batalha na segunda reportaxe do Sermos.

"Moito antes do Batalha existiu o Salão HighLife. No verán de 1906, Manuel da Silva Neves e Edmond Pascaud abriron con esa denominación unha barraca para a exhibición de cinema na Feira de San Miguel, na actual Rotunda da Boavista portuense, próxima á Casa da Música. Foron apenas dous meses, despois dos cales levaron o salón ao Jardim da Cordoaria, a cen metros da Torre dos Clérigos, e alí ficou até febreiro de 1908 en que o trasladaron ao seu emprazamento definitivo na Praça da Batalha cun adxectivo anteposto ao nome, agora Novo Salão High-Life, que nuns anos derivou no que ficaría para sempre, Cinema Batalha", sinala.

Literatura, música, cinema...

Neste número do Sermos Galiza, Tensi Xesteira analiza na sección de Libros diferentes obras, a comezar por Carmiña Sierra. A primeira muller do Seminario de Estudos Galegos, de Aurora Marco (Editorial Alvarellos, 2023). E Susana Sanches Arins fálanos de Pícache a curiosidade?, de María Canosa (Cumio Editorial, 2023).

No apartado musical, Belem Tajes analiza o disco Manual de Romaría, de Rodrigo Cuevas (Sony Music, 2023), así como outras novidades do sector, e César Morán asina o artigo 'Arrión: quando emergem os cantos populares'.

O experto en cinema Andrés Castro debulla o filme Misterio en Venecia, de Kenneth Branagh (EUA, Reino Unido e Italia, 2023) e outras películas de estrea. E o colectivo Xea, na sección Andar e Ver, trasládanos ao litoral da Capelada e Ortegal. No apartado de Escena, Manuel Xestoso analiza a obra Iphixenia na porta do súper (Compañía humana)

Por último, as dúas páxinas de pasatempos corren a conta de Xerardo R. Roca e Xoán Costa.

*Lembra que podes atopar o Sermos Galiza acompañando o xornal Nós Diario. 64 páxinas por só 3,20 euros!