A vangarda audivisual cítase en Curtocircuíto

A vangarda cinematográfica volverá a Compostela do 3 ao 8 de outubro. O festival Curtocircuíto chega á súa vixésima edición renovando a súa identidade visual, reconfigurando a súa estrutura e reforzando a presenza do cinema galego dentro do programa. A nova Sección Oficial, Cosmos, nace, segundo a organización, como un espazo de reflexión no que "fomentar o diálogo sen limitacións entre os distintos xéneros cinematográficos e a procedencia dos filmes". Máis de 30 filmes de 16 países poderán verse nesta sección, que se caracteriza por apelar á heterodoxia, mesturando diferentes xéneros, desde o documental até o cinema narrativo ou o ensaio abstracto. Algúns cineastas habituais do festival están presentes nesta sección. Así, Jean-Gabriel Périot achega L'Effort des hommes, unha reflexión sobre ecoloxía e capitalismo que xira arredor da caza da balea; Deborah Stratman, cuxa Last Things, baseada en dúas novelas curtas de J.-H. Rosny, reflexiona sobre as nocións de evolución e de extinción; ou Bertrand Mandico, que en Rainer, a Vicious Dog in a Skull Valley mestura excesos transgresores con reflexións de carácter filosófico sobre a arte e a humanidade. A carón destes, creadoras cunha traxectoria xa consolidada pero que comparecen por primeira vez ante o público do festival, como a iraniana Maryam Tafakory -que trae ao festival Nazarbazi, unha poética reflexión sobre a prohibición no cine iraniano de mostrar calquera contacto físico entre homes e mulleres-, ou o mexicano-canadense Nicolás Pereda -de quen se poderá ver Flora, unha especie de ensaio no que o cinema aparece como un territorio de ocultamentos e suxestións, co mundo do narcotráfico como fondo. E tamén cineastas novas como a andaluza Sandra Romero, cuxa El perro de un torero retrata con sensibilidade o tránsito da infancia á primeira madurez; ou Ion de Sosa, que trae desde o festival de Donostia Mamántula, unha obra que mestura terror, ciencia ficción e erotismo. Outras películas que destacan no programa da Sección Oficial son Nearest Neighbour de Rebecca Baron e Douglas Goodwin, que explora a relación entre a tecnoloxía e os seres vivos, representados aquí polas aves; a interesantísima March of Time, do portugués Pedro Maia, que partindo dunha reflexión sobre o tempo, emprega técnicas de Intelixencia Artificial para crear imaxes de 16 mm deterioradas; ademais de ensaios líricos como Alas / Tierra, de Maddi Barber ou ficcións narrativas como Zoopticon, de Sandra Trostel, Jon Frickey, Thies Mynther, no que cinco animais cantores fechados nunha nave espacial, sen saber os uns dos outros, acaban por atoparse e decatarse de que fan parte dun parque temático para un público interestelar. Un escaparate do cinema da Galiza en Compostela Audiovisual en directo Ademais dos filmes a concurso, Curtocircuíto ofrecerá algunhas propostas audiovisuais en directo que combinan diferentes disciplinas creativas. Pela del Álamo, director artístico do encontro, cre que “a exploración audiovisual é máis notoria neste tipo de creacións, polo que o cartel de experiencias live AV é, sen dúbida, unha das grandes apostas do festival”. O dúo residente en Portugal Panda Bear &amp; Sonic Boom, formado por Noah Lennox e Peter Kember, presentará Reset, un LP no que os autores toman como punto de partida unha colección de vinilos dos anos 50 e 60 para facer unha nada disimulada selección e deconstrución de sons doo-wop e rock &amp; roll clásicos. O directo de Reset expándese a través das visuais de Studio Sparks. Pola súa parte, Niño de Elche chega a Curtocircuíto para presentar un show rupturista que lle pon música en directo a dous filmes clásicos do movemento surrealista -Un chien andalou (Luis Buñuel e Salvador Dalí, 1929) e La coquille et le clergyman (Germaine Dulac e Antonin Artaud, 1928). Curtocircuíto tamén conta nesta edición coa estrea mundial da performance de José Venditti e da galega Marta Verde Espectro dorado AV, na que exploran os matices do espectro do ouro e indagan sobre a conexión humana co brillo, máis alá da súa vinculación simbólica co poder e o diñeiro, traballando con instrumentos de latón nunha intersección de xéneros que oscilan entre o free jazz, a electrónica deconstruída e a experimentación sonora. Completan o cartel de espectáculos audiovisuais a compositora ucraína Katarina Gryvul xunto co artista visual peruano Alex Guevara e unha proposta comisariada por Curtocircuíto onde o colectivo vigués Rapapawn colaborará co artista grovense Pantis creando as visuais no seu directo. Curtas distinguidas nos Oscar, Cannes, Berlín ou Venecia compiten desde esta segunda feira por entrar no palmarés do FICBUEU Xurados de prestixio Rebecca de Pas, programadora do Festival Internacional de Cinema de Rotterdam, o artista Niño de Elche e a cineasta nominada aos Premios Goya Elena López Riera (El agua, 2022) encargaranse de valorar os filmes da Sección Oficial Cosmos. Pola súa parte, a escritora e veterinaria María Sánchez (Tierra de Mujeres, 2019 ), a comisaria e crítica de arte Mónica Maneiro e a produtora catalá Emilia Fort avaliarán os filmes das seccións Planeta GZ e Supernova.