Tomi Legido: "Buscamos consenso na política da Coruña para que haxa continuidade nas actuacións positivas"

—Cales foron os motivos concretos que levaron á unión das distintas entidades que asinan o comunicado? Todo parte de que moita xente quedou sen cobrar traballos do ano pasado. Ao pórnos en contacto con outras asociacións para coñecer cal era a situación, tamén fomos conscientes da magnitude da débeda que se acumulara. Decidimos tomar accións para pór unha solución a isto, que non ocorreu unicamente coa Coruña, aínda que por volume económico o problema desta cidade é o máis grande. Unha vez que comezamos a falar, detectamos unha serie de problemáticas que están no comunicado, e isto fixo que unha xuntanza inicial entre cinco asociacións acabase sendo apoiada polas 18 que asinan o documento. Inicialmente, despois da xuntanza, solicitamos unha reunión coa alcaldesa da Coruña, Inés Rei, por correo electrónico. Ao non obter resposta pasado case un mes, decidimos facer unha solicitude por rexistro, da que tampouco obtivemos resposta. E aí foi cando decidimos que había que facer algo que fose visíbel para a cidadanía, porque moitas veces son cousas que quedan agochadas. Decidimos reunirnos fronte ao Teatro Rosalía e enviar comunicacións aos medios e, arredor de 30 horas despois, recibimos unha convocatoria para reunirnos coa alcaldesa, o concelleiro de Cultura e Turismo, Gonzalo Castro; e a funcionaria directora de área, Eva Blanco. Aínda quedan cousas por falar, mais tamén estamos pendentes de ter outras conversas co BNG e co PP. Se conseguimos un consenso na política local, vai ser máis doado, se houbese algún cambio na corporación municipal, que haxa unha continuidade coas cousas que se levan facendo todos estes anos e que consideramos que son positivas. —Por que cre que ocorreu isto o ano pasado? Polas eleccións municipais, claramente. O noso é un sector con moita visibilidade, a través de festas e programación. Para visibilizar o que pode facer un equipo municipal, en moitos casos decidiuse gastar máis do que tiñan no orzamento municipal. —No comunicado sinalan que urxe a contratación de persoal especializado na xestión cultural. En que o perciben? Nunha cidade que ten un volume de actividade brutal, hai unha demanda continua de xente profesional que poida executar unha proposta e ter un respaldo municipal e técnico, e o que temos é persoal reducido. O exemplo que pomos sempre é o do Centro Ágora, que ten capacidade para 500 persoas, mais que só conta cun único técnico de son e luces que fai o traballo de varios para sacar adiante as producións. O centro de control está na segunda planta, polo que cada vez que pasa algo no escenario ten que saír correndo para cambiar un cable ou o que sexa. A xente que ten butacas no Pazo da Ópera no que cando chove teñen goteiras mentres están vendo unha obra é un grupo pequeno de persoas. As que teñen a necesidade de utilizar o ascensor do Teatro Colón, que leva meses estragado tamén son un grupo pequeno. A xente que presentou propostas e que non tivo ningunha resposta, nin positiva nin negativa, tampouco estaba en contacto entre si. Son moitas cousas que aparentemente están inconexas, mais que teñen en común a falta de persoal cualificado que estea á fronte de determinados edificios municipais.