Tenue, banda de punk: "Estamos xirando polo mundo cantando en galego; isto debería verse máis dentro do underground"

—Como valoran a publicación de Arcos, bóvedas, pórticos? Estamos moi contentos. Lanzamos o disco en agosto e xa comezamos a xira por Europa. Foi incríbel; como todas as que fixemos, a verdade. Ao comezo tiñamos algunhas dúbidas sobre se nos Balcáns habería xente para escoitar a nosa música, mais descubrimos que si. Agora tamén estivemos en Madrid, Málaga, Lisboa, Porto e [este sábado] Barcelona, porque é para o que nos dá o tempo. Todos os da banda somos opositores para profesores, polo que entre o traballo e o estudo non temos moita marxe. —Como foron recibidos nesa xira europea? Foi unha aventura. Tivemos algúns problemas nas fronteiras, sobre todo en Bosnia. Cando chegamos ao aeroporto de Serbia tamén apareceron uns 40 rapaces que nos recibían con botellas sen etiquetar. Mais por enriba de todo salientaría o choque cultural, especialmente nestes dous países, polo contraste que percibimos a nivel ideolóxico. Nós adoitamos movernos por ambientes de centros sociais, okupas e salas con colectivos que xa están escorados a unha esquerda concreta e ao anarquismo. Eses colectivos na zona dos Balcáns parecéronnos moito máis conservadores en moitos aspectos. Claro, foi un choque porque estabamos diante de persoas cunha base anarquista, mais cunhas posturas interiorizadas relacionadas coa sexualidade e a raza que non cadran co que estamos acostumados. Non quero xulgar o ton e a normalidade coa que falaban de certas cousas, porque non teño o contexto sobre a vida destas persoas, mais é certo que houbo un choque. Con todo, si que quero salientar o feito de que somos unha banda que está xirando por todo o mundo cantando en galego. Isto tróuxonos moitísimas cousas boas e debates interesantes en moitos países, e creo que é algo que debería verse máis dentro do underground e do punk. —Cales foron os retos á hora de sacar este disco e organizar os diferentes concertos? Sacar un disco é moitísimo traballo. A medida que pasan os anos e a banda vai medrando e temos a oportunidade de ir xirando por outros lugares, tamén se burocratiza todo. O que pasa é que logo, cando xa está todo feito, estamos xirando e coñecendo novos espazos e proxectos políticos que nos parecen interesantes, vemos que pagou a pena. Este verán estaremos en Canadá e Estados Unidos e está sendo complicado. Este segundo probablemente sexa o peor país do mundo para xirar, especialmente tendo en conta a situación actual do país. Tamén a nivel de gasto, algo que non víramos até o momento, porque os visados son carísimos. O que facemos normalmente é gardar as vacacións de agosto para facer estas xiras máis longas e propornos viaxes, que ao final é o que máis nos gusta como grupo e o que máis alegrías nos dá. —Están traballando en nova música ou aínda queren seguir xirando este disco? Xa estamos traballando en novos temas. O que ocorre é que somos un pouco lentos ensaiando, porque como profesores interinos e substitutos estamos indo dun lado para outro cada pouco tempo. Ademais, o noso baixista é de Euskal Herria. Xuntámonos como podemos. Aínda así, xa estamos traballando en temas novos e distintos. Acostumamos a compor temas bastante longos, mais o concepto do disco novo vai ser diferente. Non queremos facer sempre o mesmo. Con sorte, conseguiremos gravar algunhas cousas este ano.