Susana Seivane: "Este verán atopámonos con moito traballo"

-Unha gaiteira da súa importancia a nivel galego e mesmo internacional pode coller vacacións no verán? Si, collo vacacións pero un pouco a destempo. Cando chega o verán, as persoas que nos dedicamos á música temos máis traballo, por iso eu adoito coller vacacións cando se me permite, normalmente en setembro, agora que teño nenos, antes de que empecen a escola. -Teña máis ou menos vacacións, nos seus momentos libres, que lle gusta facer? Ten algunha actividade que desfrute especialmente realizando? Pois si, gústame moito xogar ao pádel. Estiven retirada tres anos por unhas lesións nos xeonllos pero agora hai unhas semanas que volvín xogar e gústame moito este deporte. De feito, cando estaba máis en activo, cheguei a xogar a liga galega de pádel. Ademais, hai outras moitas actividades que me encanta facer cando teño tempo libre, ao vivir nunha aldea gústame ir polo monte cos cans, tamén ao río, e ese tipo de cousas. -Ten algo planeado para as vacacións ou hai demasiado traballo? Quizais algunha viaxe? Este ano o tema das vacacións está complicado. Agora que a pandemia debida á Covid-19 parece mellorar, e semella que xa se ve algo de luz, as persoas programadoras de concertos e festas queren facer todo o que non se puido até agora, entón están empezando a saír datas de concertos e atopámonos con bastante traballo. Si viaxarei por traballo, non sei se sairemos do Estado español, pero viaxes por pracer este verán non sei se poderei facer nin en setembro. -Podería recomendar algunha lectura ou algún lugar que poder visitar durante o verán? Pois pola celebración do centenario de meu avó, Xosé Manuel Seivane, fomos até o Seixo Branco de Mera (Oleiros), que recomendo moitísimo visitar, é un lugar marabilloso. No que respecta á música, escoito de todo, pero se tivese que recomendar algo de música galega diría que Treixadura, é un grupo que me gusta desde nena; fan unha música fermosísima e cuns arranxos moi coidados, e os concertos son moi divertidos. Tamén recomendaría o grupo Milladoiro, que xa son unha institución nosa.