Estas son as novidades literarias das editoriais para o comezo de ano

Novelas, poemarios, ensaios, bandas deseñadas, traducións e contos. 2024 vén ateigado de novidades literarias para todos os gustos e para todas as idades. As editoriais galegas comezan este curso co anuncio das obras que inaugurarán a sección de novidades das numerosas librarías do país e que serán o preludio de todos os libros que sairán nos seguintes doce meses. No que respecta á narrativa, 2024 promete ser un grande ano. A meirande parte do mundo editorial galego afronta este primeiro trimestre cunha forte aposta pola narración e a ilustración. É o caso da Editorial Galaxia, que destaca o próximo lanzamento, en forma de novela gráfica, da afamada obra de Neira Vilas: Memorias dun neno labrego. Desde a editorial afirman que o clásico, que poderá ser gozado no formato de banda deseñada, está "debuxado con sentimento e bo pulso narrativo". As ilustracións son de Iria Aldegunde. Á súa vez, a Editorial Xerais anuncia que o 18 de xaneiro dúas das súas novas novelas chegarán ás librarías. Unha delas é Esperta do teu sono, un traballo literario de Lola Rontano que xira arredor do conflito da mina de Corcoesto, na comarca de Bergantiños. "Esta obra mestura ecoloxía, desobediencia civil, loita pola terra e solidariedade entre comunidades rurais e urbanas", explican desde a editorial. A outra novela que publicará Xerais ese mesmo día é A ferida imaxinaria, de Berta Dávila. Segundo a editorial, este é un dos "lanzamentos máis esperados". Esta obra intimista trata sobre as relacións entre as familias, a amizade entre persoas descoñecidas e as feridas da existencia. Aira Editorial vai inaugurar o ano coa publicación de dúas traducións e dúas novelas galegas. César Lorenzo Gil, director de Aira Editorial, explica en declaracións a Nós Diario que "está previsto que estas obras saían á rúa entre os meses de febreiro e marzo". Un deses futuros traballos que a empresa de Allariz sacará á venda é A posibilidade dunha casa, un libro de Marta Orriols Balaguer, escrito orixinalmente en catalán, que conta a historia dunha xornalista que logo de estar moitos anos traballando como correspondente no estranxeiro volve a casa para repensar o enfoque do seu percorrido vital. Outra das estreas máis destacábeis de Aira Editorial é a Boca da sombra, unha obra da autora coruñesa Emma Pedreira. "É unha novela un pouco inclasificábel cun estilo moi persoal. É un libro curto, mais moi intenso", asevera César Lorenzo. Novidades en ensaios Edicións Laiovento inaugurará o seu catálogo de 2024 cun ensaio de Xosé Díaz sobre as eivas do financiamento autonómico no Estado español e o maltrato que o modelo centralizado exerce sobre a Galiza. Nesta publicación, titulada Autogoberno e sistemas de financiamento, Díaz busca demostrar que un sistema baseado na liberdade fiscal das nacións sería moito máis acertado e evitaría a discrepancia existente entre a autonomía e a soberanía. Por outro lado, a Editorial Xerais destaca a próxima publicación dun ensaio histórico sobre as peregrinacións a Compostela e os elementos vinculados ao Camiño de Santiago. O traballo titúlase Mito, historia e falsidade e chegará as librarías durante este mes de xaneiro. Cativada e xuventude Os máis pequenos e pequenas da casa poderán gozar tamén de novas historias. Un dos primeiros contos que verá a luz este 2024 será Charlotte, un conto da autora galega Consuelo Vercher ilustrado por Clara Encinas, que chegará ás librarías da man de Kalandraka. "Este libro é un canto á vida, fermosamente escrito, cunha gran sensibilidade e unhas ilustracións realistas elaboradas con grafito. É unha historia emotiva, narrada desde a perspectiva dunha nena de sete anos que mostra a visión da infancia sobre o sentido da vida", sinalan desde Kalandraka. Ademais, a mesma editorial tamén publicará no primeiro trimestre deste ano Tarde de sapo, de Maite Mutuberria, finalista do XVI Premio Compostela. No mes de marzo, Xerais publicará un álbum ilustrado para nenas e nenos chamado Sete dentes de León, creado por David Sierra e Ledicia Costas. Desde a editorial explican que este conto é como "unha fábula" que conta a historia do "nacemento do arco da vella". Pola súa parte, a Editorial Galaxia aumentará a súa colección xuvenil, coñecida como 'Costa Oeste', coa publicación de A lista das cousas imposibles, de Laura Gonzalvo. Neste libro, a autora conta a historia de Guim, un rapaz que queda en cadeira de rodas por mor dun accidente de tráfico e de Clara, quen vive a vida que Guim se imaxinara para el mesmo. O panorama literario galego promete un ano cheo de novidades literarias en lingua galega. Desde as editoriais agardan que a poboación do país se anime a mercar nas librarías da Galiza e esperan que este 2024 sexa un ano de redescubrimento do hábito de ler e de todas as obras literarias dos escritores e escritoras do país.