Tras oito meses de formación, estaterza feira rematou o obradoiro Tecer para integrar, impulsado pola Vicepresidencia da Deputación de Lugo coa colaboración de Federación de Asociacións do Ámbito Social Fadas Lugo.
Coa entrega de diplomas que acreditan a participación das quince alumnas que o seguiron, finalizaba esta actividade que procuraba, segundo a vicepresidenta Maite Ferreiro, “pór os recursos e os coñecementos cos que conta o Centro de Artesanía e Deseño para xerar oportunidades laborais tanto na artesanía como no sector téxtil”.
O deputado de Artesanía e Deseño, Efrén Castro, tamén salientou que o proxecto foi deseñado con “saberes e coñecementos tradicionais, herdados sobre todo das mulleres, mais buscando actualizalos e demostrando que a artesanía é un actividade moi produtiva e de futuro”.
Formación actual en moda sostíbel
Este obradoiro comezou o pasado 15 de setembro, con maquinaria, ferramentas, materiais e mobiliario cedido polo Centro de Artesanía e Deseño para a montaxe do taller de corte e confección no que as quince alumnas, seleccionadas por Fadas entre as súas usuarias, recibiron a maior parte das 638 horas de formación.
Nas distintas sesións, as participantes iniciáronse en técnicas de patronaxe e confección de prendas de vestir, ademais de tomar contacto, a través de conferencias, visitas e demostracións, co novo modelo da industria téxtil, as boas prácticas de moda sostíbel e obradoiros artesanais galegos dedicados ao tecido e á confección.
O aproveitamento desta formación integral ofreceulles ás alumnas a posibilidade de obter a Carta de Artesás, o documento oficial que acredita a condición de artesá.