A oposición esixe á Xunta solucionar os problemas do Centro Dramático Galego “que o PP creou”

Os catro grupos da oposición no Parlamento Galego esixiron á Xunta de Galiza a creación dunha mesa de diálogo que conte coa participación das e dos representantes do sector das artes escénicas co obxectivo de solucionar os problemas do Centro Dramático Galego (CDG) “creados polas propias políticas do Partido Popular", tal e como denunciaron desde PSdeG, En Marea, BNG e o Grupo Mixto.

Houbo tamén coincidencia en criticar a Estratexia da Cultura Galega 2021 apresentada pola Xunta, na que nin sequera se cita ao Centro Dramático Galego, como sinalou a deputada María da Concepción Burgo do PSdeG.

Como reivindicacións solicitouse a posibilidade de dotar o centro dramático dunha nova estrutura xurídica, "xa que a propia lei abre a posibilidade de crear un ente específico", en lugar de como acontece na actualidade, que figura enmarcado na Axencia Galega das Industrias Culturais.

Para a deputada Ángeles Cuña do grupo parlamentario de En Marea (formado por Anova-Podemos-EU) é lamentábel que o concelleiro de Cultura, Román Rodríguez, “insultase a oposición dicindo que "teñen tendencia inquisicional".

O Bloque Nacionalista Galego denunciou a actitude do goberno galego por incumprimento reiterado desde 2008 do Plan Estratéxico das Artes Escénicas por "puro sectarismo político", denunciou a parlamentaria nacionalista Olalla Rodil. Así mesmo, avogaron desde o Bloque pola apertura dun proceso de reflexión que o sector das artes escénicas vén reclamando á Xunta.

Desde o Grupo Mixto liderado polo portavoz da organización política En Marea, Luís Villares, interveu a deputada Paula Vázquez Verao, para quen o CDG "foi maltratado desde o 2009 pola Xunta con “continuos recortes de orzamento que reduciron a súa capacidade de traballo".

A deputada do PP Isabel Novo defendeu a acción da Xunta aludindo a “necesidade” do CDG de “adaptarse aos novos retos e cambios sociais”, e negou as críticas da oposición sinalando que o CDG aumentou o seu orzamento nos últimos anos até acadar “un investimento superior aos anos anteriores á crise”.

Novo quixo emendar a esixencia da oposición, pedindo que en lugar de crear unha mesa de diálogo se reiniciase a xa creada en 2017. Dita emenda foi rexeitada polo PSdeG, xa que esa mesa "non ten nada que ver co que se pide" porque era para "falar sobre os elencos".

A moción apoiada pola oposición non saíu adiante debido á maioría de votos negativos da bancada popular.

 

Precisamente a Asociación de Actores e Actrices de Galiza solicitou o pasado 3 de abril unha mesa sectorial coa administración e as asociacións profesionais para tratar “a refundación da institución pública de teatro” para convertela en entidade xurídica propia con orzamentos de seu e independencia.

Ademais trasladou aos partidos todas estas eivasque foron denunciando desde que Agadic estabeleceu 2016 un sistema de elección de elencos baseados na libre coconcorrencia e nas leis que rexen a función pública, un marco que desde a asociación aseguran que “non se axusta á realidade laboral do sector escénico”.

Outras problemáticas que desde a asociación veñen denunciado teñen a ver coa baixa contratación de intérpretes, a escasa produción, polémicas arredor dos procesos de selección de elenco, deriva administrativa, a burocratización e redución das xiras de distribución.