A coroa do Pazo dos Irlandeses, polo chan

A Asociación para a defensa do Patrimonio Cultural Galego (Apatrigal) vén de alertar do deterioro da coroa que preside a fachada do pazo de Ramirás, máis coñecido como o pazo dos Irlandeses, en Compostela. Segundo o colectivo, unha parte da coroa que forma parte do escudo que se pode ver no inmoble foi ao chan estes días. Nas súas publicacións nas redes sociais, nas que amosa a súa preocupación por este elemento patrimonial que estabelece entre os séculos "XVII e XVIII", estima que o suceso acaeceu na noite da cuarta á quinta feira. O mal estado deste elemento ornamental do edificio e o risco de que se precipitasen máis pezas ao chan obrigou ás autoridades a instalar un valado na rúa para que as persoas viandantes eviten achegarse demasiado ao pazo. De feito, o incidente causou danos materiais en elementos da rúa Nova da cidade. Dáse a circunstancia de que existe unha licencia para rehabilitar o edificio e convertilo nun negocio de hospedaxe, se ben as obras están paradas case desde que o Goberno municipal concedeu o permiso a principios de 2018. Despréndese a coroa do escudo do Pazo de Ramirás (antigo colexio dos irlandeses) na noite do xoves @vozdesantiago @pgsarria @vocescompostela @elcorreogallego @GALANTIQUA pic.twitter.com/iNSTKTefXJ — Asociación para a defensa do Patrimonio Galego (@apatrigal) November 1, 2021 Desde o Concello compostelán explicaron que xa reclamaron ás responsábeis que fagan as reparacións oportunas no menor tempo posíbel, dado que foi preciso instalar o cordón de seguridade. Ao seu ver, os labores de acondicionamento que se fixeran na cuberta no seu día son insuficientes para evitar calquera tipo de accidente e preservar o patrimonio cultural. Como curiosidade histórica do lugar, Apatrigal lembra un texto de El conde de Castelo no que se explica o nome popular do edificio porque no terreo houbo un colexio de irlandeses.