Neves Rodríguez: "Desfruto de non facer absolutamente nada"

-Unha comunicadora tan recoñecida como vostede colle vacacións? Non collo vacacións, levo moitos anos sen collelas en verán. Porén, no meu tempo libre gústame moito ler e ver cine, pero cando teño tempo e estou tranquila pois penso que cómpre ter as condicións adecuadas para facelo, hai que ter certa predisposición. Tamén desfruto moito de non facer absolutamente nada. Non teño ningún tipo de remorso para recoñecer que cando teño un momento para min o que prefiro é non facer nada, e préstame moito. Nesta sociedade na que todo vai rápido, eu gozo do descanso, pero cando o escollo, cando é decisión miña. Na miña profesión, o paro galopante estrutural ás veces impón a inactividade prolongada, e nese caso si procuro facer cousas. -Ten algún plan para este verán? Quizais algunha viaxe ou escapada pola Galiza. A última viaxe grande que fixen foi no século pasado. Pero pola Galiza si. Eu tiven a sorte de que o meu traballo me permitiu percorrer cada un dos 313 concellos galegos. Nese ámbito estou moi servida. Porén, gústame seguir viaxando polo país, e tamén polo norte de Portugal; eu crieime en Tui e téñoo moi perto, o que fai que me sinta moi identificada tanto cultural como lingüisticamente. -A nivel galego, hai algún lugar que lle guste visitar en verán? Gústame moito o baixo Miño, onde me criei. Vou moito por alí, sexa por citas familiares como por gusto. Esa zona ten unha luz marabillosa e espacial, para min é como estar na casa. Ademais, tamén me encanta A Mariña. Quizais polo meu traballo pero nunca me deu preguiza percorrer todo o país. -Se no seu tempo libre lle gusta ler e ver cine, recoméndenos un libro e unha película para este verán. Comezo recomendando o libro que estou lendo agora Teoría King Kong de Virginie Despentes, de temática feminista. Tamén me gustaría citar a banda deseñada de Emma Rios, Bella muerte, que para o verán é perfecto. No referido ao cine, o último que vin foi Nación, de Margarita Ledo, e quedei pampa, pareceume marabilloso como se conta a historia desde lugares exquisitos dunha maneira moi necesaria no país.