Nabiza Girl é agora protagonista dun cómic de aventuras

"Todo comezou como comezan as grandes historias, movendo un marco, e debaixo dun marco apareceu un vello pergamiño que dicía onde estaba a espada de Breogán”. Así comeza o cómic As aventuras de Nabiza Girl, Operación Breogán. Nesta primeira intervención da protagonista, Nabiza Girl introduce a persoa lectora nunha historia de acción que, ao longo das viñetas deseñadas por Manel Cráneo, vivirá da man de diversos personaxes, tanto ficticios como reais. Chelo García Naveira, máis coñecida como Nabiza Girl, é unha superheroína á que a actriz Isabel Risco dá vida nos seus espectáculos de teatro e que agora tamén protagoniza a banda deseñada que Risco, a súa creadora, vén de presentar. O proxecto, realizado grazas ás axudas á creación artística 2022 do Concello da Coruña, parte da intención da actriz por trasladar a súa personaxe a outros ámbitos artísticos. Isa Risco: Nabiza Girl “Despois de realizar unha serie de nove capítulos audiovisuais baseados nos espectáculos teatrais de Nabiza Girl, pensei en novas posibilidades para a personaxe”, explica Risco a este xornal. “Sempre me gustaron as historias de superheroes”, pero desde a perspectiva “do fracaso e da normalidade, que os fan humanos”. O humor que caracteriza a performance da artista é agora o motor que desenvolve a trama do cómic. A raíz desta idea, Risco e o guionista Carlos Ares crearon a aventura á que se enfronta Nabiza Girl nas 16 páxinas que compoñen a banda deseñada. “Esta é a miña primeira incursión no guión dun cómic, foi unha experiencia nova”, pon de manifesto Ares, en conversa con Nós Diario. A historia está ilustrada por Manel Cráneo, quen sinala a este xornal que “ao principio ía traballar só como editor, pero cando lin o guión gustoume tanto que me apeteceu demasiado ilustralo”. Estas casualidades permitiron que o equipo de Nabiza Girl, completado pola coordinadora, Marta Horjales, que levou a parte administrativa do proxecto, fora “moi agradábel e enriquecedor”, segundo asegura Risco. Isabel Risco, actriz: "A situación fixo que se programe máis cultura nas festas" O obxectivo do cómic, e tamén do propio personaxe Nabiza Girl, era “darlle ao país a nosa propia superheroína”, mantén Risco. “Quería facerlle unha homenaxe ás mulleres do rural e ao seu traballo e implicación como piares fundamentais do desenvolvemento social e cultural da Galiza”. Tendo en conta esta finalidade, o cómic resultaba un formato interesante que formou parte da cultura pop da creadora. “Foi un pracer traballar con eles; aínda que cada un viñese da súa parcela, a conexión foi total”, engade Cráneo. A espada de Breogán Ambientada na cidade da Coruña, a historia conta as aventuras ás que se enfronta Nabiza Girl no seu intento por atopar a espada de Breogán. “Queriamos ter en conta referentes propios da nosa historia, e non hai outro máis evidente que Breogán”, explica Risco. Na trama, Nabiza Girl ten que descifrar un pergamiño para descubrir onde está agochada a espada de Breogán, “pois nós tamén temos a nosa propia Excálibur!”, di Risco. Ao longo da misión, a protagonista atópase con diversos personaxes, como unha especie de Indiana Jones que traballa para unha universidade europea, moi interesada en conseguir a espada, ou un grupo de malvados que pretenden quitarlle á Coruña a súa identidade galega facendo desaparecer esta mítica arma. A diferenza dos clásicos superheroes de acción que voan e salvan o mundo, Nabiza Girl é unha personaxe auténtica e real co que todas as persoas lectoras se poden sentir identificadas. “É unha superheroína enfocada desde un punto de vista irónico, no que a retranca e o humor lle dan un carácter moi desenfadado”, indica Cráneo, que recoñece rexeitar os superheroes habituais. “Eu, que non estou interesado nesa temática, si vexo en Nabiza Girl algo real. Creo o que lle pasa porque o seu contexto é o mesmo que o de todos os galegos e galegas”. Ademais “ten motivacións vencelladas á nosa historia, tradición, costumes, cultura e á nosa forma de ver a vida” e actúa “na nosa contorna, nas nosas cidades, e vai aos mesmos bares que imos nós”, argumenta Cráneo. Isabel Risco: "A historia das mulleres galegas está soterrada" Así, conclúe que “[Nabiza Girl] é unha persoa máis da sociedade con ansias de cambiar o mundo e de loitar polo seu”. Pola súa parte, Ares considera que Nabiza Girl é unha anti-superheroína, pois “non ten poderes pero loita pola Galiza”. “É unha muller brava, e a bravura e a risa son algo imprescindíbel no mundo. A risa é liberdade, polo que os pobos máis libres son os que rin deles mesmos”, asegura Ares. Nesta liña, Cráneo engade que resulta “moi san rirnos dos nosos erros e presumir das nosas virtudes, como fai Nabiza Girl”. A presentación do cómic A presentación do libro, que decorreu o pasado día 16 na Coruña, tivo unha grande afluencia de público que encheu o Bar Sanín. “A xente veu apoiar o cómic con enerxía positiva e con moito agarimo, foi moi especial”, indica Risco. A presentación estivo marcada polo humor e a emoción, algo no que o espazo tivo moito que ver pois “as tabernas e as tascas de sempre son as que verdadeiramente teñen personalidade”. A respecto desta idea, Cráneo sostén que “é importante deslocalizar a cultura dos contextos habituais”. Ademais, o propio Bar Sanín aparece no cómic funcionando como centro de operacións da protagonista. Rosalía de Castro, a Catedral de Santiago e o Celta de Vigo nos cómics de 'Batman'? Eis as probas Co cómic na man, Isabel Risco recoñece que este proxecto foi un regalo. “As sensacións que me percorren o corpo ao ver unha personaxe como Nabiza Girl, coa que levo camiñando polas corredoiras do país durante anos, nunha banda deseñada, é indescritíbel, trémeme todo”, asegura emocionada. “Oxalá esta protagonista percorra moitos outros lugares da Galiza en novas misións que precisen da súa axuda”. Tanto Cráneo como Ares tamén concordan na idea de que esta primeira entrega teña continuación nunha serie de novas achegas de aventuras de Nabiza Girl. “É un personaxe con futuro que merece moitos máis números”, conclúe Ares.