Música en directo, marca rexistrada

Boa parte dos festivais galegos comparten nomes moi parecidos. Tamén cun gran número dos concertos programados en salas ao longo da xeografía galega e de todo o Estado. As actuacións en directo son o novo centro do negocio musical e as marcas aproveitan este tipo de eventos para promocionarse e chegar ao público máis novo e especialmente a aquel co que resulta máis complicado conectar a través doutros medios máis tradicionais. Estes patrocinios son unha necesidade da propia industria. A programación de festivais segue unha constante tendencia á alza, ata o punto de que cada vez resulta máis habitual escoitar o termo de burbulla para referirse a eles. Tan só no pasado verán organizáronse máis de un cento deste tipo de eventos ao longo de toda Galicia, moitos deles con propostas moi similares. Un panorama de crecente competencia no que semella cada vez máis evidente que os ingresos das entradas dos asistentes non son suficientes para manter un modelo de negocio masivo e con aspiracións expansivas. Alcohol e refrescos O resultado é cada vez un crecente apoio público, especialmente evidente en casos como O Son do Camiño ou o Gozo Festival. Pero por outra parte, tamén unha maior presenza das marcas con patrocinios que enchen os recintos deste tipo de eventos cos seus logos, que poñen nomes aos distintos escenarios e mesmo aos propios eventos. Un terreo no que co auxe dos festivais comezaron a introducirse numerosas empresas para, nos últimos anos, converterse nun ámbito principalmente dominado polas bebidas alcohólicas, e en concreto, unha marca galega. Detrás desta situación atópase un marco lexislativo que converteu os festivais nunha oportunidade tamén para parte destas compañías. E é que dende 1988 as bebidas alcohólicas con máis de 20 graos enfrontan un reto, xa que se prohibiu a súa promoción na televisión, medida que se estendeu a todos os medios de comunicación co obxectivo de protexer a saúde e non fomentar seu consumo. Ao longo dos anos, as empresas dedicadas á produción de bebidas espirituosas tiveron que buscar estratexias alternativas para dar a coñecer os seus produtos ao público. Coa chegada de internet e as redes sociais, esta tarefa facilitouse, aproveitando un certo baleiro legal que foi explotado con éxito por moitas marcas. A música en directo é un negocio á alza, cun crecemento constante tanto por número de eventos como por facturación En gran medida, as compañías que apoian festivais son aquelas relacionadas con bebidas alcohólicas e refrescos que se mesturan co alcohol. Durante moito tempo, estas empresas foron patrocinadoras de eventos deportivos e musicais, e recentemente dirixiron a súa atención cara aos festivais, considerándoos como o contorno ideal para cativar os consumidores. A efectividade da publicidade nestes eventos reside na súa capacidade para establecer unha conexión emocional co consumidor. Neste contexto, acostuman a buscar que a publicidade non sexa invasiva, senón amigábel, para lograr calar positivamente na percepción do consumidor durante o evento, presentándose como defensores e mesmo impulsores destes eventos de música en directo. Plataforma de promoción E mesmo así, a principal marca detrás dos patrocinios de festivais e concertos non é unha bebida alcohólica de máis de 20 graos, senón Estrella Galicia. A través do seu programa SON Estrella Galicia, este fabricante de cervexa do país dá nome a algúns dos principais festivais galegos, como o Resurrection Fest en Viveiro, o WOS Festival en Santiago, o Underfest en Vigo, o Sinsal na Illa de San Simón, o Esmorga Fest en Sarria, o Arteficial en Ribadavia ou o Portamérica en Caldas de Reis. Pero a súa influencia esténdese mesmo máis alá das fronteiras galegas, patrocinando concertos por todo o Estado como o Posidonia en Baleares, o Mira en Barcelona ou o Wakana Reunion en Cádiz, entre outros. Ademais, tamén patrocina varias decenas de pequenas salas de concertos. A día de hoxe, trátase xa da principal marca vinculada á música en directo no Estado seguida doutras cervexas como Mahou ou Heineken e xigantes dos refrescos e as bebidas enerxéticas como Coca-Cola e Red Bull. Unha realidade que evidencia que este tipo de eventos convertéronse nunha nova plataforma de promoción, ademais de ser un espazo cultural, un panorama moi diferente ao que se podía atopar hai quince anos. Unha mostra máis da crecente mercantilización de todos os ámbitos culturais, dende os máis masivos ata mesmo aqueles que ocupan espazos máis de nicho, que pouco a pouco transforman tamén estas experiencias. A música en directo é un negocio a alza, cun crecemento constante tanto por número de eventos como por facturación, queda por ver canto se poderá manter esta tendencia ou se estoupará antes a burbulla.