O cineasta Álvaro Gago inaugurou o ano liberando Matria. Esta curtametraxe, que pasou por máis de 130 festivais e recibiu máis de 60 galardóns, deu a sorpresa na edición de 2018 do Festival de Cinema de Sundance co premio do Xurado.
Matria conta a historia de Ramona, unha muller que vive cun marido co que apenas se comunica. Ademais, traballa nunha conserveira baixo as ordes dun xefe tiránico. No desafío que supón a súa vida cotiá, atopa acubillo na relación coa súa filla e coa súa neta.
O tenro e cru retrato da vida desta muller do mar, fortemente apegado á realidade, valeulle ademais a Gago unha nominación aos Goya, así como o Mestre Mateo a mellor curtametraxe.
A súa nova curtametraxe, 16 de decembro, está agora en circuito após estrearse no Festival de Locarno. Actualmente traballa no guión da súa primeira longametraxe, Algo parecido á felicidade.
MATRIA from Alvaro Gago Diaz on Vimeo.
