Maruja Mallo e Pascual Veiga, entre as candidaturas para o Día das Artes Galegas 2017

A Real Academia Galega de Belas Artes terá que decidir entre Carlos Maside, Laxeiro, Maruja Mallo, Antón Faílde, Pascual Veiga e Jesús Val i Gay a quen lle dedica o Día das Artes Galegas de 2017. O artista homenaxeado neste 2016 é Castelao.

[Imaxe: Xurxo Lobato] Real Academia Galega de Belas Artes

M. Obelleiro

30/abr./16 - 17:31 Actualizado: 03/maio/16 - 15:14

Seguinte

O plenario da Real Academia de Belas Artes, que se reuniu na mañá do sábado na súa sede da Coruña, recibiu un total de sete propostas para o Día das Artes Galegas en 2017.

Segundo puido coñecer Sermos Galiza, o homenaxeado ou homenaxeada do ano que vén atópase entre as seguintes persoas: os pintores Carlos Maside (proposto pola Asociación de Amigos Carlos Maside), Laxeiro (proposto pola Fundación Laxeiro), Maruja Mallo (proposta pola Galería 30), o escultor Antón Faílde e os músicos Pascual Veiga, compositor da partitura do Himno galego, (proposto pola Real Academia Galega) e Jesús Val i Gay (proposto polo Consello da Cultura Galega).

A decisión final coñecerase o 28 de maio, nun novo plenario da Real Academia Galega de Belas Artes, que este 2016 homenaxea Castelao como artista a quen se lle dedica o Día das Artes Galegas.