A lectura máis alá do libro, en Compostela

Desde 2021, a Selic de Santiago de Compostela -a antiga feira do libro- está inmersa nun proceso de transformación de que despraza a mirada desde o libro á lectura. Non se trata tanto de desbotar o libro como protagonista, que o segue sendo, senón en reflexionar dun modo máis amplo sobre ese complexo proceso de desciframento da realidade ao que chamamos lectura. Do 9 ao 18 de xuño, a praza da Quintana de Compostela acollerá unha nova edición da Selic que aumenta en superficie -con 26 postos des librarías e editoras- e en actividades -cunha media de seis por xornada, incluíndo un roteiro diario. Esa vocación de ir máis alá do libro reflectirase en actividades que combinan o texto con outras disciplinas. Así, nesta edición o público poderá ver unha adaptación feita polo actor Xosé Barato do libro de banda deseñada de David Rubín O lume. Ou terá a oportunidade de achegarse á obra publicada da compañía teatral Chévere a través dunha performance que contará con Xesús Ron, Patricia de Lorenzo e Miguel de Lira, núcleo da coñecida agrupación. "En realidade trátase de coller proxectos que xorden dunha lectura determinada e que acaban proxectándose noutros medios", explica Camilo Franco, director do evento, en conversa con Nós Diario. "Queremos escapar do formato clásico da presentación de libros, para explorar as diferentes maneiras que ten a literatura de presentarse nun escenario. É outra forma de achegar o público á lectura". A relación entre literatura e música -moi presente en edicións anteriores- seguirá tendo un lugar de privilexio na Selic. Este ano salientan figuras como a cantautora madrileña Cristina Rosenvinge ou o mozambicano João Afonso, que presenta un disco-libro no que musica autores clásicos portugueses. "E teremos algúns espectáculos que mesturan poesía e música e que se presentarán na Selic, como un concerto-recital que xuntará a poeta Olga Novo e a cantante Su Garrido Pombo, e outro no que colaboran Marga Tojo e Samuel L. Paris", adianta Franco. A Selic pon o foco sobre o acto da lectura Serie negra Pero o que a Selic anuncia como principal novidade desta VII edición é a estrea da Selic Criminal, unha sección coordinada polo profesor e escritor Xaquín Núñez Sabarís, que nace con vontade de ser unha cita de referencia do xénero na Galiza. "Era algo que estabamos obrigados a facer, xa que se trata dun xénero moi demandado polo público", indica o director da Selic. Esta sección, que tratará con todas as ramas da novela negra reunirá en Santiago o máis destacado do panorama ibérico. A autoras e autores galegos que xa son referencia neste xénero como Diego Ameixeiras, Pedro Feijoo ou Patricia A. Janeiro, sumaranse nomes como os de Arantza Portabales ou Lorenzo Silva, así como dous dos principais autores portugueses do xénero, Francisco J. Viegas e Francisco Moita Flores. "É curioso que, igual que non existe transvase entre o libro galego e portugués máis literario, tampouco o hai na literatura de xénero. Estamos moi atentos ao que sucede na novela negra española, francesa, inglesa... pero autores como Moita Flores, que venden moitísimo en Portugal, poderían estar máis presentes na Galiza", opina Camilo Franco. "Moita Flores é un autor bastante peculiar que foi policía xudicial e mesmo alcalde de Santarem, así que as súas tramas están moi ben enganchadas á realidade". O director da Selic anuncia que, nun futuro, ampliarase a presenza de autores portugueses. E mais unha vez, a sección tentará ir alén da literatura para adoptar unha perspectiva heteroxénea que incluirá o audiovisual, con convidados como o guionista Pepe Coira, guionista de series tan coñecidas como Terra de Miranda ou As leis de Celavella. Trinta anos tras a pegada do crime na literatura nunha xornada do CCG Vidal Bolaño e Compostela Tamén relacionado co xénero negro estará o paseo dramatizado sobre a obra teatral Doentes, de Roberto Vidal Bolaño. "Trátase dunha representación bastante audaz porque os dous protagonistas masculinos da peza estarán representados por dúas actrices: Mónica Camaño e Casilda Alfaro", desvela Franco. "Queremos que este roteiro vaia medrando co tempo, para ir transformándose nunha función teatral representada nas rúas de Compostela, onde Vidal Bolaño a situou". O teatro tamén estará presente cunha antoloxía do Torneo de Dramaturxia . E talvez algo de teatro haberá tamén na presentación do libro de Francisco X. Fernández Naval Ser cetáceo, na que Pulpiño Viascón imitará o canto das baleas cunha serra. Lecturas subliminais de realidades contemporáneas. Vinte anos sen Roberto Vidal Bolaño