ProxectoEwa mestura arte urbana e poesía. É un proxecto de recuperación urbana que non quixo ficar quedo perante a conmemoración do Día Internacional da Poesía (21 de marzo).
Con motivo desta data repartiron poemas nos mercados Berbés, Progreso, Teis, Florida e Bouzas. Unha maneira, dixeron, de levar para a casa "alimento fresco" envolto en poesía. No concreto distribuíronse 400 envoltorios creados polo Colectivo alterEgo entre as praceiras que contiñan obras da poeta Passtiche.
Aliás, lanzaron ao ar, desde O Castro, ducias de poemas acompañados de ilustracións de Jim Morrison e Castelao realizadas polo artista vigués David Arambarri.
'Poesía no ar' foi o nome elixido para esta acción coa que o colectivo de artistas decidiu achegar o xénero á veciñanza.