O Fisterra Blues Experience busca as interseccións entre tradición e modernidade

O blues, din, naceu dos cantos que os escravos negros cantaban na viaxe que os levaba desde África até América. Galiza, "centro do océano", pode ser daquela o sitio máis acaido para escoitalo. O Fisterra Blues Experience consolídase na oferta estival de festivais acollendo esta idea desde hai xa sete anos, e onte deu inicio a unha sétima edición que incide tanto no aspecto de experiencia como no de festival. Concibido como un "camiño no que atoparse coa arte", o Fisterra Blues Experience quere ir un paso máis alá do clásico festival de música para integrar no seu programa diferentes actividades que atendan tanto as tendencias xurdidas no presente como a cultura tradicional -coa mirada posta no sustentábel e no comunitario- que sostén a creación artística que se dá nos nosos días. "Experiencias únicas e innovadoras", apuntan desde a organización dun festival que visa a consolidar os vencellos co territorio e do que se pode afirmar que contempla como patrimonio as formas locais de organización e o saber popular preexistente na zona. Blues do País, blues e soul coa idiosincrasia e a retranca galegas Música e palabra A música comezou na noite de onte coa presentación do novo proxecto de Marcos Coll, Nómade, no Escenario Xacobeo, situado fronte á praia Langosteira. Acompañado do guitarrista alemán Stef Rasen, mesturou o blues da súa harmónica con ritmos latinos e música de raíz. A seguir, o trío gaditano La Perra Blanco chegou co seu power rock inspirado na música da década de 1950. E, para rematar, Pídechas o Corpo ofreceron un fin de festa, coa súa Guateque Session, digna dos anos 60 do pasado século. Era o comezo dunha celebración que proseguirá hoxe cun percorrido por distintos xéneros musicais que van desde o blues até o rock, o soul, o country ou o pop, cun cartel formado por artistas galegos e internacionais. Situada no Escenario Mar da Fala (Lugar de San Roque), a sesión vermú (a partir das 13.30 horas) contará coa actuación do estadounidense Luke Winslow-King acompañado de Roberto Luti, Dominic John Davis e o reverendo Charles Hodges. A seguir, Migui Terbutalino estirará a sesión vermú cunha sesión de pinchadiscos. Ás 17.30 terá lugar o Blues a Bordo, unha travesía musical a cargo de Cruceros Fisterra que estará animada por Adrián Costa &amp; Maquineto. Servirá de antesala á segunda velada musical no escenario Xacobeo, ao que se subirán Alexis Evans, unha das grandes promesas do soul francés; Mojo Mantra, a nova formación de Néstor Pardo, que dará aquí o seu primeiro concerto; e Madame Bird, unha formación de poderosa música negra, con influencias que van do blues ao R&amp;B, pasando pola pegada da grandísima Aretha Franklin. Ademais, haberá diferentes actuacións e ruadas de Rapacollón's Big Band e de Brass Atlantic, unha formación que practica o Dixie Funk, un estilo que recolle o son das bandas de jazz do sur dos Estados Unidos para facelo vibrar co ritmo e o ánimo do funk. Pero o Fisterra Blues Experience non trata só de música, senón que atende outras manifestacións culturais que traen a tradición até o presente. Ás 11.30, por exemplo, Xurxo Souto guiará un roteiro sonoro que, partindo da bibliotaberna A Galería do sabio taberneiro Roberto Traba Velay, visitará, entre outros lugares, a casa do inventor do futbolín, Alexandre de Fisterra; a calexa do Cintolo, para explicar que o mítico Rockhall, rocha perdida entre Escocia e Islanda, é cuspidiño na súa forma ao petón do Cintolo de Fisterra; ou a casa de Monchito Mesejo, que salvou a vida de toda a tripulación do barco no que ía cando foi asaltado en Mozambique polas tropas do Frelimo, grazas a lles falar en galego aos guerrilleiros. Ou no que se falará das relacións de Fisterra con Arxentina (e polo tanto con Italia), cunha mención á peza que lle armou á vila o grupo italiano Mau Mau. O Mar da Fala consta de espectáculos que teñen como fío común o de pór a palabra no cerne, sexa a través de recitais de poesía, da comedia ou da música. Este sábado, a partir das 18.30, estarán as historias musicadas de Zeltia e Peter, a poesía urbana de Debajodelapalmera acompañada da música de Rodrigo Valiente, as andanzas do contador de historias Lois Pérez, e a comedia de Carlos Santiago. David Regueiro abre o seu 'gypsy jazz' a outras influencias musicais Fin de festa o domingo Xa na última xornada do festival, o domingo, haberá un novo cruceiro Blues a Bordo de novo animado por Adrián Costa &amp; Maquineto ás 12.30 horas. A fin de festa celebrarase a partir das 13.30 horas cunha Jam no Faro, na que estarán presentes o humor irreverente e a poesía de Aldaolado -o dúo formado pola poeta María Lado e a música Lucía Aldao- a mestura de folk e blues do novo quinteto Malabesta e, para rematar, a clásica jam session “Conexións Atlánticas”, co guitarrista especializado en gipsy jazz -e comentarista musical en Sermos Galiza- David Regueiro e Mónica Acevedo, unha violinista asturiana afincada en Francia e moi presente no panorama jazzístico francés. Litoral de Fisterra, entre a calma da ría e a Costa da Morte