O festival do Condado, berce da poesía do país

Poesía, música, estreas audiovisuais, actividades deportivas e mesas redondas enchen Salvaterra (O Condado) nunha única xornada na que desde as 11 horas da mañá e até ben entrada a noite a arte e a cultura galegas viven protexidas no interior da fortaleza deste concello. Así, hoxe arranca a 35ª edición do Festival da Poesía do Condado, un evento que procura "achegar todo o mundo ás diferentes disciplinas da cultura galega, con especial atención ao eido da poesía", como asegura en declaracións a Nós Diario Noela Vázquez, voceira da entidade organizadora. Desta forma apostan por eliminar a concepción da "alta cultura", destacando que "non hai que ser erudito para ter acceso á arte". É por isto que desde o festival, e "a pesar de todas as dificultades que isto implica", manteñen a totalidade das actividades de balde "para que calquera persoa, por moi distante que estea do mundo cultural, poida ter esta proximidade". A cuestión económica e a falta de axudas da Administración foi o que en 1996 levou a pór en pausa o festival até 2001, cando unha nova "fornada de activistas tomaron o relevo", como explica Noela Vázquez. A pesar da transición xeneracional, as bases do proxecto mantivéronse constantes, procurando "facer país con activismo de base" e avogar por "unha defensa da cultura galega, do idioma e de reivindicarnos como oprimidos fronte ao opresor". 50 anos da SCD Condado Esta edición vén marcada polo 50 aniversario da entidade organizadora, a Sociedade Cultural e Desportiva (SCD) do Condado. Unha data para celebrar co lema do festival: '50 anos de Resistencia Cultural', unha insignia coa que Vázquez asegura que se pon en valor "unha reivindicación da nosa memoria histórica e de como impactou o traballo da asociación no Condado". Para conmemorar esta celebración, ás 12 horas terá lugar o encontro dos membros fundadores da SCD do Condado e as activistas históricas ligadas ao proxecto. Xa pola tarde, ás 19 horas, a cantautora galega Sés, o músico vasco Fermín Muguruza, a coordinadora da Arca da Noe, Noemí Vázquez, e o músico e escritor Xurxo Souto achéganse á praza do Peixe para, moderados pola activista e escritora Charo Lopes, reflexionar arredor da mesa de ideas 'Da resistencia á hexemonía cultural'. Iso si, a xornada arranca ás 11 horas coa apertura do mercado de artesanía e colectivos, onde tamén se dan cita as editoras e librarías do país para facilitar un lugar de encontro e difusión cultural. Xa desde as 11 horas a música soa co grupo Bombos os Figueiras na rúa, que chegan desde o outro lado do Miño para animar o torreiro e que sacarán de novo as baquetas unha vez chegada a tarde. Con varios escenarios funcionando de modo simultáneo, a programación contempla actividades paralelas entre as que se atopan un aberto de billarda, outro de fútbol gaélico ou o descenso de embarcacións tradicionais polo río Miño. A presentación do libro-CD da Arca da Noe, Oceanoe: Travessía polo mar das antelas, e do libro infantil Planeta Bugallo, da escritora Raquel Castro, ou a proxección do filme Black is Beltza II: Ainhoa, de Fermín Muguruza, completan as actividades dun cartaz no que os recitais poéticos, as actuacións musicais e as mesas de ideas son as protagonistas con máis de 15 artistas aportando a súa achega a un festival con moita historia e polo que pasaron figuras tan importantes para a literatura da Galiza como Manuel María, Carme Kruckenberg, Neira Vilas ou Marta Dacosta. Vangarda e historia A vangarda da música e da poesía convive con algúns dos artistas consolidados do país nun cartaz que procura, segundo Noela Vázquez, "manter a paridade de xénero, a lingua e o internacionalismo" e que conxuga a participación de figuras históricas con novas voces. No afán da organización por promover actividades a prol do traballo coa rapazada, hai oco para o lecer da cativada coa Festa Infantil a cargo dun dos pallasos con máis sona do territorio, Peter Punk. A xornada féchase coa poesía de Sechu Sende, parte da xeración dos 90 e membro fundador da antiga editorial Letras de Cal; a través da que publicou o seu primeiro poemario. Unha das novas voces da poesía actual e cofundadora da editorial independente Malafera, Branca Trigo, traerá tamén a Salvaterra as súas letras nunha fin de festa que completa Nieves Neira, xornalista e autora do poemario Neve de agosto. E cando se apagan as voces soa a música. As Fillas de Cassandra coa súa mestura entre tradición, feminismo e electrónica, Sés e súa canción de autora; a fusión de ska, reggae e punk de Dakidarría e a Banda Xangai na súa congregación dalgún dos grandes nomes da música galega e bravú porán o ramo a unha xornada na que haberá tamén actuacións poéticas e musicais espalladas polo día. Así, o grupo instrumental Caldo, o produtor e cantante Berto, o poeta portugués Tiago Alves, a escritora e colaboradora de Nós Diario Marga do Val ou a mestura entre poesía e música de Andrea Costas e Lorena Reinaldo Lusquiños; son só algúns dos exemplo das persoas convidadas a este 50 aniversario da SCD Condado e á 35ª edición do seu festival. Con todo isto, Marga do Val destaca a Nós Diario a capacidade do festival para "pór a poesía no centro da festa", salientando que "unha das cousas que facía o festival era publicar poesía e traer ao panorama literario os discursos poéticos que se facían na Galiza", recoñecendo o valor de "pórlles cara, voz e discurso ás poetas galegas". Sara Faro, integrante de Fillas de Cassandra e veciña de Salvaterra, asegura a este xornal que "a música ten moito de poético", algo no que inciden desde o seu proxecto, e destaca a marabilla de "ter ao lado da casa un festival referente en poesía". A SCD do Condado, desde a actualidade Moitos dos coloquios desta 35ª edición do Festival da Poesía do Condado veñen ligados á historia dunha asociación que leva anos loitando pola dinamización cultural e a defensa da identidade galega. Por iso Noela Vázquez asegura que "nesta edición especialmente ten moito sentido conxugar o anterior e o actual nun percorrido pola historia da organización e a investigación". É con todo isto presente que para conmemorar o aniversario veñen de publicar o libro 50 anos de resistência cultural (1973-2023), escrito de man do xornalista Carlos Barros, e que recolle a traxectoria da entidade.