Don Ramón, alma do pobo galego

Começamos o 2026 com uma boa nova para os admiradores de Otero Pedrayo e para todos os galegos que aman a sua pátria, defendem a língua/cultura galega e os direitos nacionais de Galiza. O Parlamento Galego declarou este como Ano de Dom Ramón, com ocasião dos 50 anos do seu pasamento. No passado Natal, algúns recebíamos uma felicitação da Fundación Otero Pedrayo, do punho e letra de Don Ramón que enviava cada ano aos seus amigos. A postal estava feita com a ingenuidade que mantive toda a sua vida, e com o seu compromisso inquebrável com Galiza. Acompanhava esta um pequeno poema seu sobre Galiza, que rematava assim: "A bandeira nosa ondea valente/ I-as maus de Sant-Iago con fonda lediza/ franquean as portas d'un trunfal abrente". Cada vez nos custa mais apostar pelo "trunfal abrente" da nazon galega, pelas ameaças económicas e socioculturais que segue a padecer. Por ende, o ano presenta-se mouro coas novas agressões feitas e anunciadas pelo psicopata presidente dos EUA e o imperialismo ianque. Más, se perdemos a esperança e a fé no futuro, que nos queda? A Otero, Castelao, Risco e Cuevillas devo-lhes assumir a identidade galega O meu agarimo por Otero Pedrayo tem mais dese meio século. Começou nos anos de estudante em Compostela a começos dos 70, com um pequeno estudo sobre a religiosidade da Xeração Nós; um estudo inicial que rematou logo no meu primeiro livro A xeración Nós. Galeguismo e relixión (Galaxia 1988), outro livro no que lhe dedico um longo apartado Galegos e cristians (SEPT 1995) e mais de vinte artigos sobre ele e os persoeiros de Nós. A Otero, Castelao, Risco e Cuevillas devo-lhes assumir a identidade galega. Eles são a referencia do meu galeguismo/nazonalismo galego, como reconhecia no meu primeiro artigo publicado aqui: "Por eles eu son eu" (Nós, 8/01/2020). Desde aquela eu –un mozo nascido em León, numa família leonesa logo afincada na Galiza, que buscava o compromisso co país– asumín radicalmente a rotunda frase de Castelao: "Sendo galego non podo menos que ser galeguista". A língua, o primeiro Com palavras do mesmo Otero Pedrayo no ensaio Morte e Resurrección (1932): "O galeguismo quer dizer a integridade do ser e da alma galega"; o reconhecimento de Galiza como povo com identidade própria. Nisso, a língua é o primeiro; o seu abandono é um "estado de suicidio, de renunciamento, de parva imitanza". Um parágrafo cara ao remate do ensaio resulta definitório de Don Ramón: "A língua, o primeiro. A língua, forma psicolóxica da raza, tem de ser a primeira obriga de todos. Pois co uso e cultivo cotián chegaráse axiña ao punto de unanimidade mínimo para que a galeguidade seña a fórmula completa das arelas de todos os galegos. Ao caír a língua, cai tamén a vida galega... Podemos asegurar ser mellor unha Galiza probe falando galego que unha Galiza rica usando outra língua... Ainda que a realidade nos ensina que para ser ricos e fortes, non hai outro camiño que o de ser cada dia mais xurdiamente galegos". Nesse ensaio, Don Ramón engade umas palavras particularmente caras para os comprometidos num galego-português: "Para o noso galeguismo a historia... debe rectificar o feito doroso do arredamento de Portugal. Os mellores espritos portugueses e galegos son cidadáns da integridade da Galiza... A língua debe voltar a ser a mesma para fortalecemento do seu ser trascendental... O grande optimismo da galeguidade abrangue as esencias criadoras de Portugal". Haverá mais ocasião de falar de Don Ramón nestas páginas. Agora só lembrar algumas verbas sobre ele de insignes galeguistas, recolhidas no meu livro sobre Nós. Castelao, cando se atoparon no seu exilio arxentino, dixo: "Abrazarte a ti é abrazar a Galicia". E Manuel María escreveu: "Andar pola obra de Don Ramón é andar pola ialma do pobo galego, sentila fondamente e sofrir con ela" ("Otero Pedrayo, gran galego", Homaxe da Galicia Universal, Caracas 1958). Nesta obra colectiva, Ánxel Fole chamouno "Estrela de Galicia"; Cunqueiro, "O mestre da nación". Tras do seu pasamento (1976) disse Carvalho Calero: "Ninguén nos ten dado unha imaxe de Galicia tan completa e total como Otero Pedrayo", e Celso Emilio Ferreiro: "O pasamento do Otero Pedrayo siñifica a norte do padriño bautismal europeo dos escritores de Galicia, espello de tódalas virtudes da nosa terra". Quero concluir com uma anedota na apresentação do meu livro numa livraria de Viveiro a finais de 1988. Ao remate, achegouse-me uma colega do Instituto de Burela, a quem lhe vira sair umas bágoas quando falei: "São nazonalista –disse-; mas tenho sofrido muito pelo pouco apreço dos meus por Otero Pedrayo, ao considerá-lo conservador e pouco comprometido. Não sabes que emoção senti hoje ao ouvir a tua rotunda valoração de Don Ramón".