O Consello da Cultura Galega reforzará en 2023 a acción exterior
A presidenta do Consello da Cultura Galega, Rosario Álvarez, foi a encargada de pechar onte na Comisión de Orzamentos da Cámara galega a rolda de titulares dos consellos asociados ao Executivo galego (Contas, Consultivo, CES e CCG), aberto o pasado día 30 co conselleiro maior de Contas, José Antonio Redondo.
Álvarez valorou positivamente que, despois de anos nos que a dotación ao CCG presentaba incrementos moi pequenos, “cando os houbo", agora se adopte un aumento até os 3.075 millóns de euros, co que o CCG se achega ás cifras económicas das que dispuxo en 2008. Aínda así, Álvarez non quixo entrar a comentar o que a comparación con 15 anos atrás supón en "termos relativos".
No marco da rendición de contas, a presidenta detallou que en 2022 se programaron 81 actividades e realizáronse 28 informes de diferente tipo.
Ás portas do ano no que cumprirá catro décadas, o CCG celebrará a efeméride arredor de tres eixes: facer un repaso pola historia da institución en función das actividades, persoeiros ou fitos máis salientados; reflexionar sobre a institucionalización da autonomía galega e o papel da cultura e da xestión cultural dentro desa evolución; e reflexionar sobre o futuro do país a partir de sete temas centrais que permitirán abordar os grandes debates da cultura contemporánea cunha ollada feita desde a Galiza.
Pola súa parte, os grupos da oposición lamentaron o que consideran a "falta de compromiso" da Xunta coa cultura galega que, segundo as deputadas Mercedes Queixas (BNG) e Noa Díaz (PSdeG), se reflicte na dotación orzamentaria á institución. "Non podemos aceptar acusacións graves de falta de apoio da Xunta, sobre todo cando temos un Goberno do Estado que podería facer moito máis aprobando, por exemplo, un Perte para o sector cultural", respondeu Ovidio Rodeiro (PP).
