Entre as máis coñecidas de Gallego Jorreto atópase a residencia do presidente da Xunta, o famoso Monte Pío de Santiago de Compostela. A reforma do Museo das Peregrinacións no antigo Banco de España, na praza de Praterías da mesma cidade, a rehabilitación do Teatro Rosalía de Castro na Coruña ou o Museo da Conserva da Illa de Arousa son algunhas dos seus traballos máis celebrados.
“Profeta na súa terra, desenvolveu unha arquitectura que vai desde vivendas unifamiliares a proxectos emblemáticos”, di a nota remitida polo ministerio, “caracterizada por un diálogo honesto entre os materiais tradicionais, os oficios e a modernidade. Puxo a contorna, a paisaxe e o interese xeral por diante de calquera selo persoal”.
O Premio Nacional de Arquitectura de Fomento está dotado con 60.000 euros. Do xurado desta edición fixeron parte Rafael Moneo Vallés (premio en 2015), Elías Torres Tur e José Antonio Martínez Lapeña (premio en 2016), Luis Fernández-Galiano Ruiz, Manuel Blanco Lage, Luz Fernández de Valderrama Aparicio, Concha Barrigós e Fuensanta Nieto de la Cierva.
Gallego Jorreto, que no seu día presentárase ao concurso de ideas para a construción da Cidade da Cultura e logo amosouse crítico co proxecto, foi galardoado en 2008 co Premio Nacional da Cultura Galega na súa única edición.