Bueu convértese en capital do cinema co FIC

En setembro, o cine galego vive durante dúas semanas unha das citas con maior repercusión dentro e fóra das fronteiras da Galiza: o Festival Internacional de Cine de Bueu (FIC), que reúne algúns dos nomes máis prometedores da sétima arte. No evento que cada ano decorre nesta vila do Morrazo, organizado pola asociación FICBueu co patrocinio do Concello de Bueu, conflúen todo tipo de xéneros e temáticas, desde o romance até o suspense. Todas as producións que participan no certame son curtametraxes. Isto constitúe unha aposta decidida por un formato que, na maioría dos casos, queda excluído dos circuítos comerciais. O FICBueu ofrece ao público unha visión panorámica da oferta de cine internacional. A través de cinco seccións (oficial, escolas de cinema, GZ_00, centros de ensino e descubertas) o festival reúne filmes de múltiples países. Algunhas das candidatas deste ano son Magma (Países Baixos), Azafata-737 (Grecia) Rapaza de fábrica (México) e Mar infinito (Estados Unidos). Entre as persoas participantes na sección oficial figuran Ángel Santos, David Fidalgo, Andrea Zapata e Félix Brixel. As súas producións son Alicia fai cousas, Sandwich Cat, Ruovesi e Ulises respectivamente. En declaracións a Nós Diario, o director Ángel Santos subliña a importancia que ten o festival para facerlle chegar á xente as producións independentes. Para el, participar no certame é moi atractivo, "sempre é como estar na casa", admite. Homenaxe a Ivens Esta edición rende homenaxe a Joris Ivens, unha das figuras máis transcendentais do xénero documental. A obra do cineasta holandés estará presente nunha proxección retrospectiva na que se repasará a súa obra. Ivens filmou a través da súa cámara algúns dos feitos máis importantes do século XX. A súa filmografía abrangue máis de medio cento de títulos, rodados durante seis décadas: desde A frecha ardente, até a súa última curtametraxe, Unha historia de vento, que filmou pouco antes da súa morte. Evolución do festival Desde a súa primeira edición, o festival experimentou unha evolución notábel. Un dos cambios máis transcendentes chegou o ano pasado, cando se decidiu prolongar a duración. En declaracións a Nós Diario, a codirectora do festival, María Ruíz, explica que o obxectivo era "separar a participación infantil das candidaturas adultas". Outra das razóns que motivou a ampliación do festival foi, de acordo a Ruíz, a creación dunha xornada de "divulgación" para que o público se achegue á experiencia de profesionais do mundo do cine. Anteriormente, as actividades de divulgación e de encontro entre profesionais estaban repartidas por todo o festival . Agora, "decidimos crear estas xornadas cinematográficas que cada ano terán unha temática específica e nas que se combina reflexión e pensamento". Este ano están programadas diferentes actividades dirixidas a fomentar o coñecemento sobre o cinema, como a clase maxistral impartida por Nieves Febrer "O cotián, entorno e artificio", que decorrerá o sábado 9 ás 10.30 horas na sala multiusos. Febrer é investigadora, profesora e fotógrafa musical. A súa intervención centrarase no concepto do cotián e a súa construción visual a partir de obras de diversos artistas e cineastas. Outra das citas importantes é a conversa entre a crítica de cine Andrea Mourán e a investigadora Daniela Urzola, que tratará sobre como se manifesta no cinema o cotiá a través da obra de diferentes profesionais deste ámbito. Tamén está prevista unha mesa redonda en liña na que Marta Peris, Antonio Santos, e Jordi Puigdomènech analizarán a obra de Yasujiro Ozu como referente do cinema sensíbel e cotián. Este coloquio terá lugar o sábado 9 ás 17 horas. As xornadas cinematográficas desta edición fecharán co encontro con Izaskun Urkijo, encargada da estética do filme 20.000 especies de abellas, e a súa posterior proxección, a única longametraxe que estará presente nesta edición. A profesional contará a súa experiencia como directora de arte desta obra na que o descubrimento da identidade de Cocó mestúrase coa contorna rural vasca, centrándose na creación e planificación estética do filme. Área Social FICBueu Esta edición comeza coa estrea dunha produción da área social FICBueu, unha iniciativa nada en 2016 coa finalidade de organizar o festival de cine. Desde que botou a andar, a área social ten unha vocación centrada en colectivos vulnerábeis ou que se atopan en risco de exclusión, empregando o cinema como instrumento de integración social e cultural. Esta iniciativa busca impulsar a cohesión social da contorna mediante o fomento de valores como o respecto, a igualdade e a solidariedade entre as persoas que integran a comunidade. Traballa en dúas liñas de actuación: obradoiros audiovisuais e sesións de proxección de curtametraxes con posterior coloquio ou actividades. Residencia FICBueu Este ano, desde a organización da mostra impulsan a iniciativa Residencia FICBueu, un programa formativo dedicado ao tratamento de curtametraxes na súa etapa de desenvolvemento, no que diferentes profesionais de prestixio acompañarán e titorizarán cada proxecto. A residencia inclúe varias formacións específicas en diversas áreas: guión con perspectiva de xénero, titorizada por Carmen Ávalos doutora, guionista e antropóloga; VFX desde a orixe do proxecto, impartida por Pablo Lamosa –Cormorán VFX– e novos modelos de distribución, titorizada por Elena Neira, doutoranda e docente. A edición inaugural da residencia estará titorizada pola guionista Isabel Peña, licenciada en Comunicación Audiovisual pola Universidade de Navarra. Posta en valor do curtametraxismo María Ruíz comezou a participar no FICBueu en 2018. Despois de cinco anos traballando na organización do festival móstrase orgullosa do crecemento que experimentou. "Creo que a evolución foi bastante importante á hora de profesionalizar diferentes aspectos do festival", asegura. Considera que a achega máis importante do festival é abrir as curtametraxes ao público, difundindo moitas obras que non se estrean nos circuítos comerciais. "O máis importante é dar a coñecer a calidade dun formato que non é menos bo que as longametraxes", explica.