Antía Otero abre a Selic, unha semana de libros, roteiros e música en Compostela

A IX Semana do Libro de Compostela (Selic) foi inaugurada onte nunha xornada de conversas literarias e música co discurso de benvida a cargo da poeta Antía Otero. A súa intervención foi unha oda á cidade que, como explicou a Nós Diario minutos antes de tomar a palabra en público, “é unha cidade cunha tradición literaria amplísima porque é unha cidade moi vivida na que todo o mundo, dalgunha maneira ten algún tipo de visión artística ou estética en relación á cidade”. Consecuencia disto, sinalou Otero, son todas as referencias a Compostela en moi distintos autores, autoras e músicas. “A esa bagaxe literaria da cidade debemos estar atentas, e dialogar con ela, e devolverlle todo o que nos achega”. A presentación da Selic contou coa participación da alcaldesa de Compostela, Goretti Sanmartín, e Antía Otero foi tamén encargada de presentar o evento musical da noite: un concerto de exhibición de Alvela, o novo traballo da artista Faia Díaz. Ambas mantiveron unha entrevista en público previa á actuación musical. Aliás, a xornada ofreceu a conversa ‘Libros corais, sororidade e comunidade de lectoras’, entre as escritoras Gemma Ruiz Palà e Teresa Moure. 'Percepción e incerteza': Unha exposición para ver o que non se ve Antía Otero valora o labor de Selic e destaca que se trata “dunha fantástica porta de entrada para o público lector”. Incide na importancia de que é un modo de achegarse á literatura dunha forma menos habitual, cumprindo a misión de “levar as actividades que, neste momento, xeran interese”. Alén dos límites da feira “Compostela lectora, Compostela de libro” é o lema deste evento organizado polo Concello de Santiago, que traspasa os límites de ser unha feira do libro ao uso. As diferentes actividades que a compoñen teñen como obxectivo “demostrar que hai moita vida ao redor dos libros que vai alén da lectura individual máis íntima, serve tamén para a creación de comunidade”, indica a Nós Diario Lorena Conde, directora da Selic. Sinala Conde que se trata “dun proxecto colectivo que ten a vontade de abrir o sector do libro compostelán para abrirse e darse a coñecer entre a cidadanía na maior medida posíbel”. Precisamente, un exemplo de lectura colectiva é a análise e lectura públicas que realizará mañá a escritora Patricia Janeiro de dous clásicos como Bo día, tristeza, de Françoise Sagan, e A praza do diamante, de Mercè Rodoreda, na actividade ‘Lendo con...’. Mañá tamén decorre o Encontro lector ao redor da obra Os médicos tamén enferman (Editorial Alvarellos). Nel, o autor da obra, o médico e ex alcalde de Teo e Compostela, Martiño Noriega, relata o seu retorno desde as responsabilidades políticas institucionais á medicina a través dunha serie de relatos que retratan o sistema de saúde galego. Coa intención de achegar a lectura á poboación, a organización da Selic edita un catálogo de suxestións literarias das editoras participantes, facendo que as propostas da semana literaria cheguen ás bibliotecas públicas e clubs de lectura. Ademais, a inclusión de actividades de contacontos achegan á semana do libro un público familiar. Outro modo de achegar a interacción co público xeral da cidade é o pulo de distintos obradoiros. 'Ensaios sobre o Efémero' propicia o debate sobre a literatura e a traxectoria autoral Obradoiros e petiscos sonoros Tamén haberá nesta edición da Selic eventos máis lúdicos, entre os que se atopan diferentes debates ou recitais, como é o caso dos Petiscos sonoros, que se realizará hoxe e mañá. Alén destas actividades, haberá presentacións literarias como a da Editorial Tempo Galiza da obra Castelao, desta terra e deste tempo, do escritor Manuel Rei Romeu, que será presentada, na segunda feira cunha conversa entre o autor e Anxo Louzao sobre a evolución da obra artística de Castelao, á par do seu pensamento político, e como este ten absoluta vixencia no contexto actual. Outra proposta da mesma editorial é Desvendando Rosalía e a súa obra, do historiador e crítico literario Francisco Rodríguez, que se presentará na terza feira a través dunha conferencia sobre a figura de Rosalía de Castro, reivindicando as súas ideas e, nomeadamente, a defensa da Galiza. Estas son só dúas das máis de dez presentacións literarias que terán lugar ao longo dos vindeiros días. Accesibilidade A directora da IX Semana do Libro de Compostela, Lorena Conde, destaca en declaración a este xornal unha novidade da presente edición: a accesibilidade das obras amplíase, de mans da Once e a federación Fademga, coa inclusión dun posto do libro accesíbel, que dá a coñecer a lectura fácil e a lectura en braille. Este posto contará cun espazo na Selic entre os días 10 o 12 de outubro. A iniciativa do libro accesíbel súmase ao compromiso da feira do libro compostelá, que xa nas súas edicións anteriores incluíra eventos e recitais en lingua de signos. Revolución: Xurxo Martínez guía o paseo literario sobre Antolín Faraldo Unhas das actividades máis interactivas da Semana do Libro de Compostela son os denominados paseos literarios. A través de catro roteiros pola cidade de Santiago de Compostela, o público poderá coñecer distintos universos históricos e culturais que tiveron lugar nesas rúas. Entre eles, atópase o Paseo ‘Faraldo e a revolución de 1846’, guiado polo filólogo Xurxo Martínez, na segunda feira. Xurxo Martínez, colaborador deste xornal, é o autor de Querida liberdade (Alvarellos), obra que compila unha serie de textos de Faraldo, un dos líderes do movemento provincialista galego e da Revolución galega de 1846. Neste paseo repasarase o labor político de Faraldo, que, tal e como indica Xurxo Martínez, decorreu en Compostela. No paseo visitaranse puntos como o Hostal dos Reis Católicos. Tamén a Imprenta dos Compañel, lugar de impresión do xornal oficial do goberno revolucionario galego, no que Faraldo escribe o manifesto que sentencia que Galiza é unha colonia de España, e a sede do Goberno Revolucionario, no Pazo de Fonseca. O obxectivo do paseo, para Xurxo Martínez, é “perpetuar a memoria de Antolín Faraldo na capital do noso país”, que Martínez reivindica, como unha figura esquecida.