Xantar para un sábado calquera

—Lentellas con verduriñas Normalmente prepároas con chourizo pero esta receita 100% vegana está boísima. Con chourizo ou sen el, sempre co seu toque de comiño. Elaboración: Comezamos pelando a cabaza e cortamos en dadiños. Lavamos e cortamos en toros os porros e os pementos en anacos non moi pequenos. Botamos un chisco de aceite nunha pota fonda e douramos a cabaza xunto cos porros e os pementos. Engadimos os dentes de allo pelados, cubrimos con abundante auga e botamos tamén as lentellas. Podemos deixalas a remollo a noite anterior para que sexa máis rápido cociñalas. Botámoslle un chisco de sal, pemento doce en po e comiño en po e mesturamos todo. Agardamos a que comece a ferver e deixamos a fogo medio durante uns 30 minutos remexendo de vez en cando. Un pouco antes de que pasen os 30 minutos, pelamos as patacas, escachámolas cun coitelo e incorporámolas. Probamos o sal e engadimos un chisco máis se for necesario. Seguimos cociñando outros 15 minutos, até que as patacas e as lentellas estean listas. Deixámolas repousar uns minutos e servimos ben quentiñas. —Polo á mostaza con gornición de verduras Meter no forno e agardar é todo o que imos ter que facer para conseguir este delicioso polo acompañado de verduras asadas. Elaboración: Cortamos a cebola en cuarteiróns e o pemento en anacos. Pelamos as cenorias e cortámolas en toros tamén. Colocamos todas as verduras, menos o brócoli, nunha bandexa, engadimos as patacas e regamos con aceite. Botamos un sal e pementa e metemos no forno, que previamente quentamos a 200ºC, deixamos uns 60 minutos. Nun cunco, mesturamos as 4 culleres sopeiras de mostaza con 6 de aceite e follas de tomiño. Mesturamos e reservamos. Podemos engadir máis aceite. Ten que quedar un mollo non moi denso para poder cubrir o polo con el. Colocamos o polo nunha bandexa, salpimentamos e botamos por enriba a metade do mollo de mostaza. Metemos no forno xunto as verduras e deixamos 45 minutos. Á metade do tempo, botaremos por enriba o resto do mollo. Cortamos o brócoli en ramiñas e cociñámolo coas verduras os últimos 30 minutos para evitar que se queime e fique crocante. Agardamos a que se cociñen todos os ingredientes, remexendo as verduras de cando en vez. Finalmente, servimos o polo acompañado da gornición cun chisco do mollo de mostaza que ficou no fondo da bandexa e decoramos cunha ramiña de tomiño. —Torta de mazá A torta de mazá é unha sobremesa moi sinxela e un clásico nas receitas de doces. Facémola cunha base de masa quebrada, crema pasteleira e mazás con marmelada. Elaboración: Comezamos coa masa quebrada. Botamos nun cunco a fariña peneirada cun chisco de sal e coa manteiga en pomada, mesturamos todo coas mans até ter unha mestura areosa. Engadimos o ovo e amasamos coas mans para obter unha masa homoxénea. Botamos fariña sobre a mesa e seguimos amasando outros 5 minutos. ormamos unha bola, cubrímola con film e deixámola repousar unha hora na neveira. Estendémola cun rolete e colocámola sobre un molde redondo apto para o forno. Picamos cun garfo e cubrimos con papel de forno e con garavanzos por enriba para evitar que suba. Metemos no forno, previamente quentado a 180ºC, e deixamos 15 minutos. Para facer a crema, botamos a metade do leite nun cazo coa rama de canela e 2 anacos de reladura de limón. Deixamos a fogo medio até que ferva para que infusione coa canela. No leite que reservamos, botamos a maicena aos poucos mentres mesturamos para evitar que se formen bolos. Nun cunco á parte, batemos o azucre cos ovos e engadimos todo ao leite frío coa maicena. Cando teñamos o leite infusionado coa canela, pasámolo por un coador e mesturámolo xunto cos outros ingredientes. Poñemos a crema no cazo a lume baixo e remexemos cun batedor de globo até que comece a espesar, retiramos do lume e deixamos arrefriar uns minutos. Unha vez retiramos a base do forno, agardamos a que arrefríe e esparexemos a crema sobre a masa de modo que fique uniforme a superficie. Pelamos as mazás, cortámolas en 4 cuarteiróns e cortamos estes en láminas coa axuda dunha mandolina ou cun coitelo no seu defecto. Colocamos os anacos de mazá sobre a crema en círculos concéntricos e metemos no forno durante 45 minutos a 180ºC. Retiramos do forno e deixamos arrefriar. Finalmente, mesturamos nun cunco 3 culleres de marmelada cunha culler de auga e pintamos cun pincel a torta por enriba para darlle brillo. Agardamos a que arrefríe de todo para tirar o molde e xa podemos gozar dela.