Xantar para un día solleiro de outono

Cabaza asada con salsa de iogur, milgranda e noces Neste xantar imos aproveitar ao máximo todos os produtos do outono. Comezamos cunha cabaza asada acompañada de mollo de iogur e con noces e milgranda por enriba. Ingredientes (2 persoas): ½ cabaza, 2 iogures naturais,zume de medio limón,5 dentes de allo, pementa negra, sal, aceite de oliva, 8 noces peladas, ½ milgranda Elaboración: En primeiro lugar tirámoslle a casca á cabaza e cortámola en cuarteiróns. Nunha bandexa para o forno colocamos papel vexetal e dispoñemos sobre ela os anacos de cabaza xunto con 4 allos enteiros e sen pelar. Botámoslles sal e pementa moída por enriba e regamos cun chorriño de aceite todos os anacos. Imos metela no forno, que previamente quentamos a 180º C, durante uns 40 minutos máis ou menos. Mentres se cociña a cabaza aproveitamos para facer o mollo de iogur. Esprememos o zume de medio limón e botámolo no vaso dun batedor, a continuación engadímoslle un allo pelado e trituramos. Agregámoslle os dous iogures, un chisco de sal e un chorriño de aceite e remexemos ben até que se integren todos os ingredientes. Cando teñamos a cabaza pronta, retiramos do forno e servimos nos pratos con mollo de iogur por enriba e decorada con anacos de noz e milgranda. Solombo de porco con puré de mazá e castañas Solombo de porco con puré de mazá e castañas O solombo de porco podemos acompañalo con moitas gornicións. Aproveitando os produtos do outono imos facelo cun puré de mazás e castañas cocidas, que contrastaran co solombo co seu sabor doce. Ingredientes (2 persoas): 1 solombo (400 g), 2 mazás grandes, 2 dentes de allo, 1 culler de mel, ½ vasiño de albariño, 1 chorriño de zume de limón, pirixel, tomiño e albahaca secas, 12 castañas, aceite de oliva, sal, pementa negra Elaboración: Antes de preparar o solombo imos cocer as castañas, para iso tirámoslles a pel exterior e botámolas nun cazo con auga fría e un chisco de sal. Cando comecen a ferver agardamos 20 minutos e pelámolas antes de que arrefríen para que sexa máis doado. Reservámolas para a gornición e comezamos co solombo. Salpementámolo e botamos nunha tixola un chorriño de aceite de oliva, cando estea ben quente engadimos o solombo e dourámolo ben por todos os lados para selalo. Picamos moi fino os dous allos cun coitelo e nun cunco mesturámolos co vaso de viño, o mel as herbas e un chorriño de aceite. Integramos todo ben e cun pincel pintamos o solombo. A continuación metémolo no forno, que previamente quentamos a 170º C, e deixámolo uns 25 ou 30 minutos pintándoo un par de veces máis polo medio co mollo que preparamos. Mentres se cociña o solombo aproveitaremos para facer o puré de maza, pelamos e cortamos en anacos as mazás e botámolas nunha pota pequena cun chorriño de zume de limón e medio vaso de auga. Deixamos a fogo suave uns 15 minutos, remexendo de cando en vez até que se desfagan ben e queden coa textura desexada. Pasados os 25 minutos podemos darlle un corte no medio ao solombo para ver se xa está ao noso gosto ou o preferimos máis cociñado, o ideal é que fique algo vermello polo centro para que estea máis zumarento. Finalmente cortamos en toros o solombo e servimos no prato botándolle por enriba unha culler do mollo que se formou na bandexa e acompañado do puré de maza e das castañas. Flan de castañas. Flan de castañas Imos darlle unha volta ao flan de toda a vida e engadirlle un toque doce co produto estrela do outono galego, as castañas. Ingredientes (8 persoas): 500 ml de leite, 200 ml de nata para bater, 100 g de azucre moreno, 250 g de castañas cocidas e sen pel. 5 ovos. Para o caramelo: 100 g de azucre, 16 g de auga, Para decorar: castañas en almibre, nata batida, Molde: 8 moldes de flan de 8.5 cm de diámetro. Elaboración: Comezamos facendo o caramelo caseiro, pero podemos mercalo xa feito se preferimos, xa que o resultado será moi similar. Para preparalo botamos nun cazo primeiro a auga, a continuación o azucre e poñémolo a lume medio sen remexer, imos movendo pouco a pouco o cazo con movementos envolventes. Pasados uns minutos remexemos cunha culler de pau até que se integre todo. Cando comece a coller cor apagamos o lume e deixamos repousar un pouco para que acabe de facerse. Por último vertemos o caramelo no fondo das flaneiras e deixamos arrefriar. Para prepara o flan trituramos as castañas cun pouco de leite no vaso dun batedor e a continuación engadimos o azucre e os ovos. Seguimos batendo e engadimos o resto do leite e a nata. Mesturamos todo ben co batedor e enchemos as flaneiras, con atención de non enchelas de todo para que non sobresaia ao cociñarse. Imos cociñalos ao baño maría, para facelo colocamos todas as flaneiras nunha bandexa alta apta para o forno. Botamos auga no fondo da bandexa até cubrir uns 2/3 das flaneiras e metémolo no forno, que previamente quentáramos a 170º. Deixamos uns 45 minutos máis ou menos. Retiramos do forno e deixamos que arrefríen de todo antes de metelos na neveira. Servimos ben fríos fóra dos moldes e acompañados de nata batida e castañas en almibre. Para sacalos dos moldes pasamos con moito coidado entre o molde e o flan unha folla fina de coitelo para despegalos e a continuación dámoslles a volta sobre o prato nos que os imos servir.