Mar e montaña

Lombo de porco con piña Mais unha das moitas receitas da miña amiga Ricucha. Salgamos a carne e bótaselle a pementa negra moída. Nun recipiente, quéntase 50 ml de aceite. A lume forte e virándoo, dóurase o lombo por ambas as partes durante 5 min para selalo. Xa dourado, reservámolo. Nunha bandexa para enfornar, esténdense 50 ml de aceite e colócase a carne. Por enriba e polos lados do lombo, cubrímolo coas lascas do entreteto. Sobre o touciño entrefebrado afumado, colócanse as rodelas de piña por enriba e polos lados. Bótase todo o almibre (ou caldo de azucre) da lata. No forno prequente a 200º C, ásase durante 1 hora e 15 minutos. Compróbase cun pincho se está cocido. De non estalo, enfórnase 15 minutos máis. Sérvese quente, partido en toros. Notas: Pódese empregar xamón de porco celta no canto do entreteto. —Mexillóns en aceite Límpanse os mexillóns baixo un chorro de auga, rascando as cunchas. Cocémolos ao vapor cunhas follas de loureiro, escúnchanse e cortámoslles as barbas para deixalos limpos. Colócanse ben xuntiños nun recipiente con tapa e cóbrense de aceite. Bótase o pemento estendéndoo coa culleriña para que se dilúa e non forme bolos. Cortamos a cebola en rodas moi moi finas e póñense por riba dos mexillóns. Tápase o recipiente e deixamos repousar 24 horas. Pódense servir nun prato co aceite e a cebola ou escoalos e servilos sós. Notas: De querermos que piquen un pouco, úsase pemento picante no canto de doce. —Sémola con piñóns e noces Sobremesa de orixe turca, á que nos convidou Luci do Barco alá polos anos noventa. Nunha tixola a lume medio derrétese a manteiga. Refogamos nela os piñóns ou noces e a sémola de trigo, remexendo con culler de madeira 5 minutos até ficar ben tostada. Nun cazo quéntase o leite, a auga e o azucre, sen que chegue a ferver. Incorporamos a mestura de líquidos moi ao xeito porque co contraste de temperaturas pode salpicar, mexendo até a sémola absorber todo o líquido. Apágase o lume e cóbrese o recipiente cun pano e co testo por riba. Debe repousar unha hora. Coa man esfarélase a masa, repártese en cuncas ou pratos e botámoslle o mel ou a canela. Notas: É mellor usarmos saborosos piñóns galegos (algo máis caros), pois os chineses (máis baratos) son insulsos e non teñen ningún sabor. De querérmola máis doce, bótase 1 vaso de azucre. Dependendo do tamaño dos gránulos de trigo, coñécese como sémola (superior a 0'4 mm) ou semolina (inferior a 0'2 mm).