Eu o que quero é xamón, xamón...

—Salmón recheo en papillota Na peixaría deben tirar a espiña central. Como sempre queda algunha espiña, arrancámolas con pinza de depilar até que, ao pasar a man, nin se noten nin pinchen. Úntase con manteiga o papel de aluminio e poñemos o peixe aberto coa pel para abaixo. Sálgase o salmón e úntase con aceite. Nunha metade esténdese unha capa de lascas de xamón, por riba outra de champiñóns laminados e logo outra cos lagostinos ou gambas en anacos. Cérrase o salmón e envólvese en papillota moi fortemente co papel de aluminio. No forno prequente a 180º ásase durante 45 minutos. Retírase o papel e sérvese quente. Notas: Esta receita fornecida pola miña biblioteca gastronómica particular, a miña amiga Ricucha, pódese facer con troita asalmoada grande. —Torta de cabelo de anxo con xamón Facer o cabelo de anxo: No forno a 100º metemos a amolecer a cabaza enteira dúas ou tres horas. Sácase do forno, ponse no vertedoiro e, quente, dáselle un forte golpe ou ábrese cun coitelo para baleirala. Sepárase a polpa da cortiza, retíranse as pebidas. Pésase a polpa. Ponse a cocer a lume manso nunha pota con 1 decilitro de auga, engádese o limón partido á metade, mexendo de cando en cando para que non pegue, cocerá 30 minutos. Bótase o azucre e o pau de canela. De novo, 30 minutos a lume baixo, remexendo. Coa pota tapada, déixase macerar até o día seguinte. Coce de novo unha hora a lume moi manso, mexendo de cando en cando. Ao arrefecer, retírase o limón e o pau de canela. Se hai algún anaco de polpa que non esfiou, desfaise coas mans. Montar a torta: Nun molde, sobre papel de enfornar, estírase a masa, deixando dabondo nas beiras para cerrar a torta. Estendemos unha capa de cabelo, cubrimos coas lascas de xamón partidas en anacos medianos. Dóbranse os lados, estirando a masa para tapar o xamón. Poden ficar anacos sen cubrir. Pintamos a torta co ovo batido. No forno prequente a 200º, enfórnase 45 minutos. Sérvese quente. Notas: A Cucurbita ficifolia (cidreira caiota) dá un froito de forma elipsoide, coa casca verde con manchas brancas, co que se elaboran doces. De sobrar cabelo, embótase cocéndoo a baño maría 30 minutos. Gárdase como unha conserva ou conxélase. Cabe usar cabelo de anxo comercializado. Moito obrigada á nai de Inés, Miguel e Sara por ternos convidado a degustala por primeira vez. —Iogurtes de limón Mestúranse no batedor os iogures, o leite condensado e o zume dos limóns. Repártese a crema en recipientes individuais e deixamos repousar 24 horas no frigorífico. Ao servir, esparexemos por riba da crema un chisco de canela ou serraduras de tona de limón. Notas: Resultan máis saborosos de seren iogures caseiros. E máis cremosos se a base son iogures gregos.